أخبار محكمة الأسرة اليوم
ضهري اتحنى.. منيرة بدعوى إعلام وراثة: أعمام ولادي بيكلمونا في الأعياد بس
دعوى إعلام وراثة رفعتها «منيرة» في محكمة الأسرة بعد أن خسرت كل الدعم في حياتها، فتوفى ابنها ولم تأخذ وقتها حتى تستوعب صدمتها توفى زوجها وأصبحت وحيدة في الدنيا دون سند أو ضهر لها؛ واستغل الناس ضعفها ووحدتها في الدنيا ليسرقوها ويسرقوا حق أبنائها مما جعلها تتوجه لمحكمة الأسرة على أمل أن تحصل على حقوقها.
قصص محكمة الأسرة.. حياتنا طبيعية زي أي بيت
بدأت «منيرة» حديثها وقالت: «أنا جيت المحكمة أرفع قضية إعلام وراثة، أنا عندي 3 أولاد، ومتجوزة ابن عمي، الحياة كانت طبيعية ومفيش مشاكل في حياتنا غير العادية زي أي بيت عادي وناس عادية، كانت الظروف صعبة بس زي الناس كلها كنا مستورين وعلى قد حالنا جوزي كان راجل صعب بس كنت بستحمله عشان ولادي».
دعاوى محكمة الأسرة.. جوزي وابني ماتوا
أكملت حديثها قائلة: «لحد من سنة وشويةابني الوسطاني اتوفى، كانت حادثة اتوفى وهو لسه صغير ومتجوزش ولا عاش حياته، قلبي اتوجع عليه وكنت هموت وراه، بعد وفاته حصل مشاكل كتير بيني وبين جوزي بسبب أننا كنا زعلانين على موت ابننا، لحد ما توفى هو كمان بعدها بفترة قصيرة».
حكايات محكمة الأسرة.. اتسرقت عشان مليش ضهر
تابعت حديثها قائلة: «بعد موت جوزي وابني اتبهدلت أنا وولادي، الناس سرقونا عشان احنا لوحدنا ومفيش حد معانا في الدنيا، مبقاش معانا فلوس وظروفنا صعبة، كان كل اللي عندنا عربية جوزي سابهالنا، مكنش فيه حد يشتغل عليها جبنا واحد سواق مكناش نعرفه كويس سرق فلوسنا وسرق العجل وسرق كل حاجة في العربية ورماها».
قضايا محكمة الأسرة.. دعوى إعلام وراثة
أنهت الزوجة حديثها قائلة: «قدمنا بلاغ في اللي سرقنا ومعرفناش ناخد حقنا جيت المحكمة عشان أعرف أبيع العربية لأنها داخلة المجلس الحسبي معرفتش ابيعها على طول، لأن مفيش حد يقف معايا في الدنيا أنا وولادي أخوات جوزي بيكلمونا كل عيد ملهمش علاقة بينا ساعة الفرح واحزن بس نسأل على بعض زيهم زي الغرب مش بيسألوا فينا ميتضمنوش ».