أخبار محكمة الأسرة اليوم
داليا لـ محكمة الأسرة : عصبي وبخيل من الخطوبة وفي الأخر طفشني
دعوى خلع في محكمة الأسرة كانت صاحبتها «داليا» الذي تحدت العالم بأجمعه من أجل زوجها حتى تعيش معه حياة طبيعية، لكن اتضح أنها كان من المفترض أن تتركه منذ خطوبتهم عندما اكتشفت بخله وطباعه الصعبة، وكانت نفس الطباع اللي تسببت في خراب بيته أول مرة هي السبب في توجهها لمحكمة الأسرة لتنهي حياتها مع زوجها.
قصص محكمة الأسرة..أهلي هما اللي خلوني وافقت عليه
بدأت «داليا» حديثها وقالت: «أنا متجوز من 2019 خلفت من جوزي ولد واحد وسايباة من شهر 8 اللي فات، أنا وجوزي مكناش نعرف بعض كويس قبل الجواز، أهلي كانوا يعرفوه ويعرفوا أهله وهما اللي قالوا إنه كويس ومحترم وده اللي خلاني وافقت عليه، اتجوزنا على طول مفضلناش كتير مخطوبين، أنا مكنتش موافقة عليه في الأول لأنه أكبر مني بـ 17 سنة، بس لما لقيته محترم وكويس وافقت عليه ».
دعاوي محكمة الأسرة..عصبي وبخيل من الخطوبة
أكملت حديثها قائلة: «في الخطوبة عرفت إنه كان متجوز قبل كدة وقالي إن هو اللي طلقها بسبب إنه مرتاحش معاها وإنها كانت مش كويسة ومش مريحاه، كان عنده منها بنت وقال إنها مانعاها عنه وأنا صدقته ساعتها، من الخطوبة وهو باين عليه إنه عصبي وبخيل، بس لما اشتكيت لأهلي قالولي كل الرجالة كدة ولازم استحمل».
حكايات محكمة الأسرة.. مبيصرفش عليا أو على ابنه
تابعت حديثها قائلة: «من ساعة ما اتجوزته وحقيقته بانت، مبيصرفش غير على القد لو صرف أصلا مع إن معاه فلوس وبيشتغل بس بيبخل على بيته وابنه، كان ممكن اتحمل في الأول بس ابنه ملوش ذنب إنه يتبهدل معاه، فوق البخل كان عصبي جدا وبيعمل مشاكل كتير بسبب ومن غير سبب، حاولت كتير معاه إنه يبقى كويس ومنخربش البيت بس مفيش فايدة».
قضايا محكمة الأسرة..طفشني زي مراته الأولى
أنهت الزوجة حديثها قائلة: «اكتشفت إنه بيكدب عليا و مراته الأولى هي اللي كانت رافعة عليه خلع وكسبته، وهو اللي مبيرحش يشوف بنته ولا بيصرف عليها، وطفشها بسبب عمايله السودة، اتحملته عشان خاطر ابني لكن في الأخر لقيت مفيش فايدة معاه وسيبته، وجست عشان أرفع عليه قضية خلع زي مراته الأولى وهرفع عليه قضية نفقة عشان خاطر ابني ».
تابع أحدث الأخبار عبر
