أخبار محكمة الأسرة اليوم
خلع بالصدفة.. عادل بمحكمة الأسرة: شتمتها مرة واحدة عملت قفل للباب وطردتني
كان سبب تواجد «عادل» في محكمة الأسرة هو زوجته التي رفعت عليه دعوى خلع دون علمه، وبالرغم من أن الزوج أتقى الله في زوجته طوال سنين حياتهما سويًا ما تلقاه في النهاية هو الغدر من زوجته أم أولاده بسبب رفضها أن تعيش حياتها معه بشكل طبيعي مثل أي زوجين.
قصص محكمة الأسرة..اتجوزتها بعد الجامعة على طول
قال «عادل» في بداية حديثه: «أنا متجوز بقالي 18 سنة، أنا ومراتي كنا قرايب من بعيد، خلفت منها ولد وبنت كانت كويسة جدًا وأهلها ناس محترمة اتجوزتها بعد ما خلصت جامعة على طول، وفي أول الجواز الدنيا كانت كويسة ومفيش مشاكل غير الطبيعية زي أي اتنين متجوزين».
دعاوى محكمة الأسرة.. عايزة تخرج وترجع براحتها
أكمل حديثه وقال: «أنا اللي كنت بشتغل وأصرف على البيت كنت بتقي ربنا فيها وفي العيال وعمري ما زعلتها، كانت مشكلتها أن كلمتها من دماغها مش عايزة تسمع الكلام في أي حاجة، كانت بتبقى عايزة تخرج وتيجي براحتها من غير إذن ولا تشاورني، حاولت كتير معاها إنها تتعدل لكن مفيش فايدة، كانت طول الوقت مصممة تخرج ومتقولش اتخانقت معاها كتير لكن كنت مش عايز أخرب البيت عشان الولاد ميتبهدلوش».
حكايات محكمة الأسرة.. شتمتها مرة واحدة بس طردتني
تابع الزوج كلامه قائلا: «فضلنا على المشكلة دي كتير ، مغلطش فيها ولا مرة مرة واحدة بس خرجت من البيت راحت فرح من ورايا لما عرفت اتعصبت عليها في خناقة وشتمتها كانت أول مرة وساعتها سابت البيت و أنا صالحتها ورجعتها عشان خاطر العيال، وبعد ما رجعتها وصالحتها غيرت كالون الشقة ومعرفتش أدخل البيت، أهلها هما اللي صالحونا ساعتها على بعض ».
قضايا محكمة الأسرة.. عرفت إنها رافعة خلع بالصدفة
أنهى حديثه: «رغم كل اللي عملته ده مطلقتهاش بس أخر مشكلة سابت البيت لأنها كانت عايزة تسافر وأنا كنت رافض عشان الظروف مش مناسبة، وقتها سابت البيت ومقالتليش وبعد ما سابته معرفتش أرجعها تاني، بقالهل سنة سايبة البيت، بصرف على الولاد وعليها ومفيش حاجة عاجباها برصة، لحد ما اكتشتف أنها رفعت عليا قضية خلع بالصدفة».