أخبار محكمة الأسرة اليوم
أميمة: سرق دهبي عشان يجهز نفسه ويتجوز عليه بفلوسي
رفعت «أميمة» دعوى في محكمة الأسرة، لتحصل على حقها في قائمة المنقولات، بعدما غدر بها زوجها الذي عاشت معه 22 عاما وأنجبت منه أطفالها، وظنت أنه سيكون شريك حياتها لكنه خانها وسرقها وتركها هي وأولادها دون سؤال.
قصص محكمة الأسرة.. اتجوزت صاحب أخويا
بدأت «أميمة» حديثها وقالت: «أنا متجوزة من 22 سنة، جوزي كان صاحب أخويا، خلفت منه ولد في 3 جامعة وبنت في 3 إعدادي، جوزي زمان كان كويس جدا ومكنش فيه أي مشاكل معاه أو مع أهله، وكان بيشتغل ويصرف على البيت وأنا بشتغل وفلوسي معايا وبساعد لو البيت احتاج حاجة، والحياة كانت ماشية وكنا زي أي اتنين عاديين».
دعاوي محكمة الأسرة.. عايز يتجوز عليا
أكملت حديثها قائلة: «المشاكل معاه بدأت من سنة بس، بطل يصرف غير على القد وهو عمره ما كان كدة زمان، وأكبر مشكلة كانت إنه بقى يخوني ويعرف عليا ستات، الأول شكيت فيه بس بعد كدة هو راح قال لأخويا صاحبه إنه هيتجوز عليا، صبرت عليه عشان خاطر ولادي».
حكايات محكمة الأسرة.. سرق دهبي
تابعت حديثها قائلة: «لحد في يوم لقيته داخل عليا ومعاه خشبة كبيرة ضربني وهددني إنه هيموتني وسرق مني الدهب بتاعي عشان عايز يتجوز ويبقى معاه فلوس يجهز نفسه، وخدوا فعلا ووداه عند أهله، بعد كل اللي عمله معايا رجعتله تاني لما وعدني أنه هيتعدل معايا ويرجعلي دهبي».
قضايا محكمة الأسرة..مبيسألش فينا
أنهت الزوجة حديثها قائلة: «بعد ما رجعتله متعدلش وفضل زي ماهو، وبقى أوحش بيكلم الست اللي يعرفها عليا ولاده سمعوه وقالولي ولما واجهته مد ايده عليا تاني، وقتها سيبته ومقدرتش ارجعله تاني، سايباه من شهر 5، والطلاق حصل بحكم محكمة في شهر 4 ومسألش فيا أو في عياله من ساعتها، سيبت البيت وسافرت بنتي الصغيرة بس معايا وهي اللي طلبت إني أخدها معايا، رفعت عليه قضية طلاق وكسبتها وقضايا نفقة لبنتي وليا، دلوقتي رافعة قضية بالقايمة عشان حقي اللي اتاخد مني».