أخبار محكمة الأسرة
محكمة الأسرة وحكاويها | سهير بدعوى تمكين: طردني أنا والعيال عشان طلبت الطلاق
اتجهت “سهير” إلى محكمة الأسرة من أجل رفع دعوى تمكين بعد ما هددها طردها الزوج من شقة الزوجية؛ بسبب رغبتها وإصرارها على الطلاق، وكان الحل الوحيد الذي يجب على الزوجة إتباعه هو دعوى تمكين في محكمة الأسرة.
روايات محكمة الأسرة.. عديتله كتير من ساعة ما اتجوزنا
استهلت الزوجة حكاياتها لقاضي محكمة الأسرة مؤكدة على المشكلات الموجودة بينهما من بداية الزواج ولكنها حاولت التغاضي عنها حتى لا تفتعل المشكلات معه، قالت سهير: "كان في مشاكل بينا من ساعة ما اتجوزنا بس اللي هو المشاكل العادية مكنتش خلافات كبيرة أو حاجة بس بدأت المشاكل دي تكبر مع الوقت والخناقات بينا بدأت تكتر عن بداية الجواز كمان، وسبت البيت كذا مرة وكل مرة أهلي كانوا بيرجعوني عشان ألم الدنيا ومكبرش المشاكل بينا".
قصص محكمة الأسرة.. كل مرة يوعدني إنه هيتغير ومبيتغيرش
تركت سهير المنزل كثيرًا وكان الأهل هم السبب الرئيسي في تهدئة الأوضاع بينهما ولكن تطرق الأمر إلى محكمة الأسرة ورفع دعوى تمكين، تابعت للقاضي: "لما المشاكل كترت بينا بسبب طريقته معايا وضربه فيا مكنتش ببقى عايزة ارجع البيت تاني بس أهلي كانوا بيغصبوا عليا أرجع والم الدنيا عشان البيت والعيال، وأنا كنت بسمع كلامهم وارجع البيت تاني عادي، وهو كان كل مرة بيوعدني إنه هيتغير ومش هيبقى في مشاكل تاني بس مفيش فايدة فيه خالص، وكل مرة المشاكل بينا بتكبر أكتر والخناقات بتكتر بينا أكتر واكتر".
دعاوي محكمة الأسرة.. سهير في دعوى تمكين
قررت “سهير” طلب الطلاق من زوجها بعد ما تصاعدت المشكلات بينهما بطريقة جعلتها تدرك أن القرار الأصلح لها هو الطلاق وترك حياتها الزوجية ولكن كان هذا الطلب سبب في غضب الزوج واندفاعه من خلال طردها هي والأولاد بعد ما صارحته برغبتها في الطلاق، تستكمل الزوجة حكاياتها لقاضي محكمة الأسرة قائلة: “كل مرة يقولي هتغير ويرجع تاني يضربني ولا كأننا قولنا حاجة أصلًا، لما لقيت مفيش فايدة فيه خلاص والمشاكل عمالة تزيد بينا طلبت منه الطلاق بس هو قالي مش هطلقك واللي عندك اعمليه ولما لقاني مصممة إني اتطلق راح طاردني أنا والتلات عيال وقالي مش هتدخلي الشقة دي تاني طالما انتي عايزة تتطلقي”.
لم يعد أمام “سهير" حل ينقذها ويساعدها في مشكلاتها سوى محكمة الأسرة التي قصدتها من أجل رفع دعوى تمكين أقامتها منذ شهرين ولا توال تتابع إجراءات دعوى التمكين في المحكمة.