أخبار محكمة الأسرة
حسن لـ محكمة الأسرة: رميالي العيال وعايزة تاخد نفقتهم
أمام أعتاب محكمة الأسرة تواجد «حسن» الزوج المظلوم الذي تركته زوجته دون سبب منطقي وتركت له أولاده حتى تعاقبه وتتركه ليتحمل المسؤولية بالكامل وحده ويكون لهم اب وأم ولم يكفيها ما فعلته مع زوجها وظلها له وتدمير اسرتها، توجهت لمحكمة الأسرة حتى ترفع قضايا نفقة على زوجها دون وجه حق وبسببها يحمل الزوج الألم والحسرة على خسارة اسرته وخسارة سنين حياته.
قصص محكمة الأسرة..أتجوزت مراتي عشان ضامن أهلها كويسين
قال «حسن» في بداية حديثه: «انا ومراتي متجوزين بقالنا ٨ سنين معايا منها بنت وولد، أنا وهي كنا قرايب من بعيد، اتقدمتلها عشان كنا ضامنين إن أهلها ناس كويسة وفعلا مشوفتش منهم حاجة وحشة لما دخلت بيتهم واتجوزنا وخلفنا على طول بعدها ولحد وقتها الدنيا كانت كويسة مفيش مشاكل».
دعاوي محكمة الأسرة..الحياة كلها مشاكل
أكمل «حسن» حديثه وقال: «الخناقات بينا كانت من زمان بس كانت بتعدي عادي وبسيطة وكانت بتعدي مكنتش أعرف أنها في يوم ممكن تزيد وتوصل للي احنا فيه ده، المشاكل كنا بنبقى احنا الاثنين سبب فيها كانت بتبقى على المصاريف او مشاكل تخص العيال أو أي مشكلة المهم الحياة كانت كلها مشاكل وكانت كل شوية تاخد العيال وتسيب البيت بسبب الموضوع ده وانا كنت برجعها».
حكايات محكمة الأسرة..سايبالي العيال عشان اتربى
تابع «حسن» حديثه قائلا: «لحد اخر مشكلة حصلت بينا كانت هي السبب فيها وقتها خدت الولاد ومشيت من البيت وراحت عند أهلها ولما جيت طلبت الطلاق قلتلها خلاص عايزة تطلقي خدي إلى انتي جبتيه ونطلق ودي، وقتها الأولاد كانوا معاها حوالي أسبوع وببعتلها مصاريفهم، لما معجبهاش الكلام، جابت العيال ورمتهملي عشان اتربى بيهم ومعرفش اتصرف معاهم».
قضايا محكمة الأسرة..رفعت قضية نفقة صغار والعيال معايا
أنهى «حسن» حديثه: «حاولت اصالحها واخليها ترجع لبيتها وولادها لكن مفيش فايدة معاها، وفي الاخر اتفاجئت انها رافعه عليا قضية نفقة صغار والعيال معايا أصلا وانا اللي قاعد معاهم بقالي فترة وبتتهمني قصاد الناس اني مانع العيال عنها وده محصلش ابدا، كلمت أهلها عشان يعدلوها لكن محدش فيهم قدر عليها ».