أخبار محكمة الأسرة اليوم
شمس لـ محكمة الأسرة : راجل نرجسي مبيحبش غير نفسه ولما ربنا كرمه بخل عليا
كانت شمس أمام أبواب محكمة الأسرة وهي تحمل الألم في عينيها عما عاشته مع زوجها الذي لم ترى معه أي راحة منذ زواجها منه وعاشت معه وتحملته لسنين عديدة على أمل أن ينصلح حاله ولكن تملك اليأس من الزوجة وتخلت عن أمل أن ينصلح زوجها في يوم من الأيام وظنت أن انفصالها عنه سينجدها لتعيش حياتها بشكل طبيعي لتجد نفسها في مأزق أكبر بعد طلاقها منه.
قصص محكمة الأسرة..اتجوزت بالغصب
قالت «شمس» في بداية حديثها: «أنا متجوزة من 33 سنة وعندي ولادي كبار، وأنا وجوزي منفصلين من 13 سنة ، كان جواز عن طريق القرايب وأمي هي اللي غصبت عليا إني اتجوزه، أنا مكنتش عايزة اتجوز بس هي قالت لازم وصممت على موقفها لحد ما اضطريت اتجوزه».
دعاوي محكمة الأسرة..جوزي كان راجل نرجسي
أكملت «شمس» حديثها وقالت: «مشاكلي معاه كان سببها المصاريف، كان بيصرف زمان عادي كان مضطر عشان المسؤولية بس كان بالضالين وبالمشاكل، كان بيعاملني يوم كويس وعشرة وحش، كان راجل نرجسي مبيحبش غير نفسه كنت بصبر عليه يمكن يتعدل في يوم من الأيام».
حكايات محكمة الأسرة..مش عايز يعرفني إن بقى معاه فلوس
تابعت «شمس» حديثها قائلة: «لحد ما جاله شغل كويس وفلوسه كتير، وقتها مكنش عايز يعرفني انه جاله الشغل ده هو كان بيشتغل ومعيشنا ب 600 جنيه بس ومكنش عايزني اعرف عشان مطلبش منه فلوس زيادة، ولما عرفت عمل مشاكل كتير مع العيال ومعايا وقتها خدت قرار إننا ننفصل نبقى عايشين في نفس البيت بس كل واحد عايش لوحده وفي حاله فضلنا كدة 6 شهور ومعجبوش طبعا لأنه نرجسي وعايز الناس كلها تهتم بيه شخصية مش سوية».
قضايا محكمة الأسرة.. رافع تخفيض نفقة مع إنه معاه فلوس
أنهت «شمس» حديثها قائلة: «بعد كدة اتطلقنا لأنه مستحملش ورفعت نفقة بعد الطلاق ومكنش بيدفع ومطلع عينينا مع انه بيشتغل ومعاه فلوس، رفعت القضايا مضطرة هو دلوقتي رافع قضية تخفيض نفقة فاضطريت ارفع قصادها زيادة نفقة لولادي عشان النفقة اللي اتحكملي بيها أصلا قليلة وانا وكيلة ولادي ومش باخد منه حاجة».