أخبار محكمة الأسرة اليوم
محكمة الأسرة .. سارة: عملوا عليا رباطية وطردني أنا وبنتي في الشارع
كانت محكمة الأسرة ودعوى طلاق للضرر هي الحل الأخير الذي لجأت له «سارة» بعدما واجهت غدر وقسوة الدنيا بسبب زوجها الذي كان من المفترض أن يكون سندها في الدنيا وشريك حياتها، لكنه أصبح ألد أعدائها بسبب أفعاله التي لا تحتمل، فبدل أن يحافظ الزوج على زوجته طردها من بيتها هو وأهله وابتزها حتى لا تستطيع أخذ حقوقها، حتى أوصلها لأبواب محكمة الأسرة حتى تحاول أن تحصل على حريتها فقط التي منعها عنها أيضا.
قصص محكمة الأسرة.. كان نفسي في بيت وأسرة مكنتش اعرف اللي فيها
قالت « سارة» في بداية حديثها : «أنا اتجوزت من 8 سنين خلفت من جوزي بنت واحدة بس وسايباه دلوقتي بقالي كام شهر، جوزي اتقدملي وعرفني عن طريق انه سمع عني لما جه اتقدملي سألنا عليه وطلع كويس ووافقت عليه كان نفسي ابقى عروسة ويبقى ليا بيت وأسرة مكنتش إن هيحصل كل ده في الأخر».
حكايات محكمة الأسرة.. مبيصرفش وأنا بعدي الدنيا
تابعت «سارة» حديثها قائلة: «أول كام سنة في الجواز الحياة كانت طبيعية وكويسة وماشية، المشاكل بينا كانت زي أي زوجين عادي مش حجات كبيرة وكانت بتتحل بينا انا مبرحش لأهلي ولا أشتكيلهم، المشاكل معظمها كانت على المصاريف وإنه مبيصرفش كنت بعدي الدنيا عشان مش عايزة أخرب بيتي».
دعاوي محكمة الأسرة.. عايز يبيع البيت عشان يرميني في الشارع
أضافت الزوجة: «المشاكل بيني وبين جوزي كانت بتزيد وهو مكنش حد بيقفله ولا بيدافع عني، لحد ما حصلت بينا مشكلة كبيرة على المصاريف، وقتها سيبت البيت ورحت عند اهلي عشان كنت زهقت من المشاكل بعد ما مشيت عرفت أنه اتفق مع أهله علشان يبيعوا البيت ويطردوني انا وبنتي برا البيت ».
قضايا محكمة الأسرة.. جوزي وأهله ضربوني وسرقوا حقي
أنهت «سارة» حديثها قائلة: «لما حاولت اتفاهم مع اهله ومعاه وارجع لبيتي مرضيوش يرجعوني وقالوا خلاص إحنا مش عايزينك انتي ولا بنتك، ومرضيوش يدوني حاجتي ولما رحت عشان أخدها ضربوني وكان معاهم جوزي، وقتها رفعت قضية طلاق للضرر عشان اعرف اخد منه حقي».