أخبار محكمة الأسرة
محكمة الأسرة وعجائبها .. نوال في دعوى خلع: كتفني وقصلي شعري
قصدت نوال محكمة الأسرة بعد 13 عامًا من المعاناة التي تعيشها مع زوجها المدمن، تصاعدت معه الأمور مع مرور الوقت جعلت العيش سويًا يكاد يكون مستحيل بسبب تصرفاته الناتجة عن عقله المغيب لذا كانت محكمة الأسرة ورفع دعوى خلع هي الحل الأخير الذي توسلت إليه بعد كل هذه السنوات.
قصص محكمة الأسرة .. كان عارف الحشيش وبعد كدا اتطور
"في الأول كان بيشرب حشيش بعدين اتطور وبقا يشرب حاجات تانية كتير"، بهذه الكلمات استهلت نوال رواياتها للقاضي وتستكمل باقي حديثها مؤكدة على أنه يعرف طريق المخدرات من بداية الزواج ولكنه توسع لأنواع أخطر ما جعل المشكلات تتفاقم بينهما والحياة تستحيل بينهما بسبب تصرفاته وأسلوبه الهمجي الناتج عن شربه للمخدرات التي غيبت عقله وكانت النتيجة لكل محاولاتها هي محكمة الأسرة ورفع دعوى خلع، تابعت: "كنت عارفة من الأول إنه بيشرب حشيش بس كنت بقول إنه هيتغير ويبطل القرف اللي بيشربه دا بس الحقيقة إنه كان بيزيد في القرف ومبقاش بيشرب حشيش بس دا كمان عرف الأنواع الجديدة الي بتبقى أخطر كمان من الحشيش بكتير".
حكايات محكمة الأسرة .. بحاول معاه بقال 13 سنة
كان لديها الأكل بأن الأمور تتتغير في يوم من الأيام ولكن في الحقيقة أن المشكلات كانت تتفاقم بينهم مع مرور الوقت، أضافت نوال: "عايشين في مشاكل ليل ونهار بسبب أسلوبه الهمجي معايا عشان عقله مبقاش فيه خالص، بقالي 13 سنة عايشة معاه وبحاول أخليه يبعد عن الطريق دا خالص بس مفيش فايدة وعاجبه حاله وهو كدا"، تستكمل قائلة: "قلت له يبطل الحاجات دي عشان خاطر العيال وعشان ميشوفوش أبوهم وهو في الحالة دي بس ولا كأني بتكلم، بالعكس كان بيزيد في شربه أكتر وأكتر".
عجائب محكمة الأسرة .. نوال: قصلي شعري
تمادى الزوج في شربه للمخدرات بطريقة مفرطة جعلت تصرفاته غريبة غير واعي لها، بدأت تفكر في اللجوء إلى محكمة الأسرة ورفع دعوى خلع بعد ما تأكدت أن حياتها تكون أفضل بكثير عندما تبتعد عنه، تابعت: "مبقاش عارف هو بيعمل إيه عقله طار خالص من المخدرات اللي بيشربها دي، وأخر مرة كان بيتخانق معايا لقيته كتفني وقصلي شعري، خدت العيال وسبت البيت ورفعت عليه قضية خلع عشان أخلص من العيشة معاه"، لا تزال القضية منظورة في المحكمة حتى الآن.