نشرة أخبار محكمة الأسرة اليوم الثلاثاء 23/1/2024
محكمة الأسرة اليوم .. نوال: ماشي مع جارتنا في الحرام.. وسهام: سابني وراح عند أمه عشان اتجوز
يعرض موقع الحادثة نشرة أخبار محكمة الأسرة اليوم يرصد فيها أهم القضايا التي شهدتها المحكمة كل يوم وما هي أبرز القصص والحكايات، سنتعرف على حكاية كل زوجة وما السبب القوى الذي جعلها تقصد المحكمة لتنهي حياتها الزوجية من خلال أهم القضايا التي قابلناها على أعتاب محكمة الأسرة اليوم.
محكمة الأسرة وحكاياتها.. نوال: ماشي مع جارتنا في الحرام
15 عام من المحاولات التي قدمتها نوال في الحياة الزوجية المنهكة بلا جدوى ولكنها كانت مستمرة في محاولاتها لعل الأمور تتغير في يوم من الأيام كانت نهاية كل هذه المحاولات هي محكمة الأسرة، قالت: "استحملت معاه كتير وهو بيشرب المخدرات وكنت بحاول أغيره بس اللي مقدرتش اعديها أبدًا من ساعة ما شفت رسايل ومكالمات من جارتنا على تليفونه، مكنتش فاهمة ليه بيتكلموا أصلا ولما تابعت المكالمات والرسايل اللي بينهم لقيت الموضوع واصل لمرحلة غريبة مش فاهمة وصلوا لهنا إزاي، والغريب بقا إن جارتنا دي متجوزة هي كمان ومخلفة ومستغفلة جوزها"، لم تتحمل الخيانة وقررت التوجه إلى محكمة الأسرة مباشرة لرفع دعوى خلع، انهت قائلة: "خلاص جبت أخري بعد 15 سنة ومقدرتش استحمل يوم واحد تاني كمان ورفعت عليه قضية خلع"
محكمة الأسرة ..سهام: سابني وراح عند أمه عشان اتجوز
"سابني وراح عند أمه بقاله سنتين بسبب إنه مش راضي يصرف عليا أنا والعيال وكل ما أطلب منه فلوس يقول لي مش معايا وأنا عارفة إنه معاه ويقدر يصرف علينا كويس جدًا" بدأت سهام بهذه الكلمات رواياتها لقاضي المحكمة مؤكدة أنها عاشت ما يقار التسع سنوات في استقرار، لتتبدل حال حياتهما بعد ذلك، أكملت: "كلمته كتير عشان يرجع للبيت والعيال بس هو مش راضي فا سبته وقلت شوية ويرجع، بس خدت الصدمة بعد سنتين لما عرفت إنه اتجوز، ومش فاهمة إزاي مش معاه فلوس يصرف علينا ومعاه فلوس يتجوز" لذها السبب لجأت إلى محكمة الأسرة ورفع دعوى طلاق للضرر حملت دعوتها رقم 69 في المحكمة.
قصص محكمة الأسرة ..أمنية: اداني بونية اغمي عليا بعدها
عاشت أمنية فترة خطوبة تكاد تكون مثالية بكل المقاييس ما جعلها تبتي توقعات لشكل حياتها بعد الزواج وأنها ستكون مليئة بالسعادة الغامرة ولكن الواقع كان أكبر صدمة بالنسبة لها بعد مرور أول سنة من الزواج وقالت أمنية: "أول سنة كانت الدنيا تمام بينا ومفيش أي مشاكل بس بعد أول سنة دي كل حاجة اتغيرت زبان على حقيقته معايا، ومبقاش يتعامل غير بالضرب وضربه غبي جدا، وكذا مرة يضربني بالبونية يخليني يغمى عليا"، سئمت من إهانتها وضربها طوال الوقت ما جعلها تقصد محكمة الأسرة لرفع دعوى خلع بعد ما تحطمت كل أحلامها السعيدة التي رسمتها في بالها عن الحياة الزوجية.
طرائف محكمة الأسرة .. سلوى: رافعة قضية مرازية فيه مش عشان الفلوس
لجأت سلوى إلى محكمة الأسرة بزنانيري بعد 6 سنوات من الزواج لرفع دعوى نفقة ضده بسبب تصرفات الزوج الغريبة وعدم رغبتها في تحمل مسئولية المنزل، وقالت: "جيت أرازي فيه عشان بقالي 6 سنين معيشني في مرار، يسيب البيت بمزاجه ويقعد بمزاجه، ومش عايزني أقوله أي حاجة ولا أتكلم معاه"، اختارت طريق القضاء من أجل "المرازية" في زوجها ليس من أجل الفلوس، انهت قائلة: "أنا اقدر اصرف على البيت عشان كدا كدا بشتغل ومعايا فلوس بس أنا عايزة اطلع عينه عشان يعرف إن الله حق".
تابع أحدث الأخبار عبر
