"بيت العائلة سبب المشاكل كلها".. سناء للقاضي: عايزين ياكلوا حقنا بعد عشرين سنة
عندما تزوجت «سناء» في بيت عائلة وبدأت المشاكل في الحدوث وكانت تزيد مع الوقت قررت الزوجة وزوجها أن يتركوا المنزل ليحافظوا على أسرتهم من المشاكل ولكن لاحقتهم المشاكل لسنين عديدة.
كانت حياة «سناء» مع زوجها يملأها الحب والود بالرغم من المشاكل العديدة التي حصلت مع أهله لسنين عديدة، فكان زوجها خير الزوج والأب لذلك عندما توفى وخسرته كان حزنها عليه شديد، وقبل استطاعتها تجاوز الألم الذي تركه وفاته في قلبها وجدت نفسها في مواجهة أهل زوجها الذي حاولوا أن يوقعوها في المشاكل رغم بعدها عنهم لسنين عديدة، وتوجهت في النهاية لمحكمة الأسرة لتستطيع مواجهتهم.
زواج دام 50 عام
قالت سناء: «أنا اتجوزت من 50 سنة، خلفت من جوزي 5 أولاد، وجوزي اتوفى من 3 شهور بس، وفاته كانت صعبة عليا زعلت عليه جدا هو عشره عمري كله وأبو ولادي، من ساعة ما اتجوزنا واحنا مكنش في مشاكل بيني وبينه، كان راجل محترم وصاين بيته و ولاده ومش مخلينا محتاجين حاجة، عشنا في أول جوزانا في بيت عايلة وفي الأول وحصل مشاكل كتير معاهم بس كنت بتحملهم وأعدي عشان خاطر جوزي مكنش وحش معايا»
مشاكل بيت العائلة
تابعت سناء: «المشاكل في بيت العايلة كل مادى كانت بتزيد، كانوا بيسرقوني وبيتهموني في شرفي وجوزي لما لقى كدة فهم اللي بيعملوه معايا وكان عايز ننقل ونعد في بيت تاني برة بس الظروف مكنتش مناسبة، أخواته كانوا متجوزين قرايبي أي مشكلة بتحصل مع حد منهم كان لازم البيت كله يتنكد عليه ويحصل فيه مشكلة، اخوه اتجوز على مراته اللي هي قريبتي واحدة تانية قريبتي برضو، حصل مشاكل كتير معاهم وقتها واضطرينا نسيب البيت ساعتها، عشان مبقيناش قادرين نتحمل مشاكلهم.»
دعوى إعلام وراثة
أكملت سناء: «سايبين البيت بسبب مشاكلهم بقالنا عشرين سنة بس لينا الشقة بتاعت جوزي اللي هي حقي انا و ولادي، لما جوزي مات وجينا نقسم الورث وحبينا نبيع الشقة رفضوا يدونا حقنا وقالولنا ملكوش حاجة عندنا، وانا و ولادي مش بتوع مشاكل بس هما اضطرونا نيجي المحكمة ونرفع قضية إعلام وراثة عشان نعرف ناخد حقنا.»