«مضاني على وصولات أمانة».. كريمة لـ القاضي: بضرب من أول شهر جواز
عاشت «كريمة» تجربة زواج أليمة؛ فلم تكمل إلا شهرين مع زوجها حتى شهدت خلالهما القسوة والألم التي لم تتوقعهما أبدًا من زوجها الذي اختارته لتكمل حياتها معه.
كريمة لـ القاضي: بضرب من أول شهر جواز
تزوجت «كريمة» لمدة شهرين في أول شهر وهي مازالت عروسة جديدة ضربها زوجها وعنفها عندما رفضت أن تكون خادمة لوالدته و كانت تكن لها كل الحب وما وجدته من حماتها وزجها إهانة وقسوة، وعندما عملت «كريمة» أنها حامل حاولت أن تعطي فرصة ثانية لزواجها ولكن ما وجدته من زوجها قسوة وتعنيف وإهانة في حقها، ولمدة 4 سنين عاشتهم «كريمة» في محكمة الأسرة لتحصل على حقوقها من زوجها الذي لا يعرف الرحمة.
بتضرب من أول شهر جواز
قالت «كريمة»: أنا اتجوزت من 2019 خلفت من جوزي ولد وجوازنا دام شهرين بس سيبته وانا حامل ودلوقتي بقالي 4 سنين في المشاكل، المشاكل بدأت من أول شهر جواز لما أمه كانت عايزاني خدامة ليها أنضف لها البيت وامسحه بعد ما كنت بعاملها كويس ومفيش أي مشاكل معاها، ساعتها شتمتني وبهدلتني وعملوا معايا مشاكل كتير وجوزي مسكني ضربني بعد شهر جواز واحد بس وقالي أنا واخدك خدامة لأمي.
مضاني على وصولات أمانة
تابعت «كريمة»: سيبته بعد ما ضربني ومكنتش عايزة ارجعله تاني لكن اكتشفت وقتها اني حامل وقررت وقتها ارجعله عشان ابني ميتبهدلش وقلت ادي بيتي وحياتي فرصة، أمي عالجتني من الضرب ورجعتله، رجعت شهر بس شفت منه وش مشفتوش قبل كدة، مضاني على وصولات أمانة قالي يا تسقطي اللي في بطنك يا تمضي على الوصولات مضيت عشان خفت على نفسي هيعمل فيا ايه.
طلع راجل مش محترم
أضافت «كريمة»: عمل معايا مشاكل كتير وكلم أهلي يجو ياخدوني وقال أسوء كلام عليا وعلى سمعتي وانه خلاص مش عايز يكمل معايا، ساعتها سييته ومرجعتلوش تاني أبدا لأنه اللي بيضرب ويهين مراته ميبقاش محترم، وبعد ما سيبته جاب واحدة كان على علاقة بيها قبل الجواز جابها اعدها في شقتي وكان بيبعتلي صورهم عشان يعرفني ويغظني وبيصورها وهي لابسة هدومي.
ابني فاكر أبوه مات
أكملت «كريمة» كلامها: سيبته وأنا حامل و بعد الولادة جه عمل نفسه بيشوف ابنه وكان عايزني ارجع وانا رفضت مقدرش ارجعله عايز يرجعني عشان ياخد الولد ويرميني في الشارع تاني، ابني عنده 4 سنين ميعرفهوش، اتصل بيا من قريب وكان بيتخانق معايا عشان مش عايز يبعت فلوس لأبنه ندهتله الولد عشان يكلمه الولد قالي ده مات يا ماما.
دعاوي في محكمة الأسرة
أنهت «كريمة» قصتها وقالت: رفعت قضايا قايمة ونفقة وضرب وسب وقذف وكل حاجة، بلغ عني بوصل أمانة من اللي معاه لما رفعت عليه قضية النفقة، وهو لسه شتايم وبهدلة من ساعة ما سيبته، جاية المحكمة عشان زيادة نفقة ابني لأنه مخدناش منه جنية، ودلوقتي معيش ادخل ابني المدرسة، انا اللي بشتغل في البيوت واصرف على ابني من ساعة ما اتولد.