سعاد أمام محكمة الأسرة: غضبت عند أهلي كام يوم رجعت لقيته ولع في الشقة
فترة خطوبة تكاد تكون مثالية للكثير بسبب كل ما تحمله من السعادة والتفاهم الذي كان يحاوطهما من كل الجهات، دخلت عش الزوجية وكانت هنا بداية كل المشكلات، وجدت الزوجة نفسها في حياة غير الذي رسمتها في خيالها، حياة بائسة مع زوج مدمن أرادت التخلص منها من خلال رفع دعوى طلاق بمحكمة الأسرة.
بدأت سعاد حديثها وهي تصف شكل حياتها في فترة الخطوبة مع الشخص الذي اختاره قلبها مؤكدة أنها عاشت أجمل أيام عمرها خلال فترة الخطوبة مع رجل يرعاها، تكمل الزوجة قصتها وتقول: "كانت أحلى فترة في عمري هي فترة الخطوبة، كنا مبسوطين فيها وكان أسلوبه معايا من كتر ما هو كويس كانت الناس بتحسدني إن ربنا رزقني بواحد زيه، وكنت فاكرة إن حياتنا بعد الجواز هتبقى أحلى كمان من الخطوبة".
طلع بيشرب مخدرات
كل توقعات الزوجة تحطمت بعد أشهر قليلة من الزواج وأكدت أنها رسمت حياة يغمرها السعادة ولكن الزوج كان السبب الرئيسي في فشل حياتهما الزوجية في بداياتها، تستكمل الزوجة الحديث: "يدوب كان كويس معايا في اول كام شهر في الجواز بس بعد كدا لقيت حد تاني خالص معايا، على طول زعيق وخناق حتى أسلوبه بقا غريب في التعامل معايا وكل ما أجي أكلمه يقلبها خناقة"، تابعت: "سيبت البيت وفكرت في الطلاق بس كنت برجع وأقول بلاش احنا لسة في الأول وأكيد مش فاهمين بعض، بس اللي اكتشفته إنه بيشرب مخدرات وهو دا اللي غيره أوي كدا".
رجعت من عند أهلي لقيته ولع في الشقة
أدركت سعاد أن الهروب من الحياة اللي عيشاها هي أسلم حل لها، ما دفعها تأخذ قرار الانفصال بلا رجعة خصوصًا بعدما حرق شقة الزوجية دون مبرر، وأكدت على أن تعاطيه للمخدرات هوالسبب في كل شيء، أضافت سعاد: “تصرفاته الغريبة عمالة تزيد وخناقاته بقت طول الوقت معايا، أخرة مرة سبت فيها البيت رجعت بعدها بكام يوم لقيت الجيران بيطفوا الشقة من الحريقة اللي هو عملها، خفت على حياتي معاه ورفعت قضية طلاق عشان أخلص من اللي أنا فيه دا”.