رانيا لـ القاضي: «سيبت البيت رجعت لقيته متجوز التانية على عفشي»
قضايا نفقة وتبديد عفش وتميكن وخلع هذا هو حال «رانيا» حاليا لتحصل على حقوقها من زوجها الذي سرقها وغدر بها وبأطفالهم ولم يكون سند لهم في هذه الدنيا وتركهم ولم يراهم من 5 سنين.
تقدم لـ«رانيا» وهي في أول حياتها عن طريق المعارف، شاب متيسر ماديا ولديه وظيفة محترمة وبان عليه الالتزام والاحترام وانه من عائلة محترمة، ولكن منذ زواجها منه وتوالت عليها المفاجئات والصدمات في زوجها، واكتشفت انها لا تعلم أي شيء عن الشخص الذي تعيش معه تحت سقف واحد وانجبت منه اطفالها الإثنين، لم تعلم عندما تزوجته أن في يوم من الأيام سيتركها زوجها هي واولادهم ويأخذ عفشها ليتزوج به واحدة أخرى وأنها ستضطر أن تلجأ في النهاية لمحكمة الأسرة لتحصل على حقوقها منه.
اقرأ أيضا
«رانيا»: اكتشتف إن جوزي كان متجوز وعنده ابن 13 سنة
قالت «رانيا»: «اتجوزت في 2012 وسيبت جوزي في 2018 كان جواز صالونات، كان ميبنش عليه أي حاجة قبل الجواز كان شكله محترم وابن ناس لكن كل حاجة عنه من أول اتجوزنا وهي مش حقيقة وأنا اتخدعت فيه، من ساعة ما اتجوزنا وأنا بكتشف عنه بلاوي، بعد ما اتجوزنا بسنتين اكتشفت إنه بيشرب خمره هو كان بيسافر يشتغل بره ولما سافرت معاه مره عرفت إنه بيشرب، حياتي معاه كانت كلها إهانة وضرب وشتيمة وكنت بعدي عشان أعيش».
تابعت: «اكتشفت لما اتجوزنا إنه كان متجوز قبلي وعنده ابن 13 سنة سايبه في الإمارات ومبيشفهوش من ساعة ما اتولد، واكتشفت بعدين إنه اتجوز عليا واحدة تانية».
«رانيا»: سيبت الشقة رجعت لقيته خد العفش عشان يتجوز بيه.
تابعت «رانيا»: «بعد 4 سنين جواز حصل مشكلة كان عايز ياخد مني الولاد وياخدهم عند أهله وافقت وقلتله خدهم ومتسيبهمش عند أهلك، لأن أهله كانوا بيعاملوا ولادي وحش، عمل مشكلة وحبسني في أوضة النوم وقفل عليا بالمفتاح وسابني ومشي، كلمت أهلي كسروا الباب وخرجوني وسيبت الشقة ورحت لوالدتي رجعت لقيته خد العفش عشان يتجوز بيه مراته التانية».
اقرأ أيضا
«رانيا»: ولاده مبيحبوش يفتكروه
أضافت «رانيا»: «لما سرقني سيبته ومرديتش أرجعله تاني ورفعت دعوى خلع وكسبتها، وهو اتجوز ورامي أولاده ومبيصرفش عليهم مشفهمش ولا كلمهم من ساعة الطلاق دلوقتي مش بيحبوا يفتكروه حتى، عندي منه ولد وبنت كانوا في لغات بعد رفضه إنه يدفع المصاريف دخلتهم حكومة، دلوقتي رفعت عليه دعوى نفقة وبقالي 5 سنين مش عارفة أخذ منه عفشي وحاليا معرفش مكانه فين ولا هو فين».