نادية في دعوى نفقة: مش مكفيني وسرق عفشي واتجوز عليه واحدة تانية
بعد زواج دام 10 سنين تحملت خلاله «نادية» زوج لم يتسم بأي شكل من أشكال الرحمة أو الرأفة بها أو بأولادها وجعلها تلجأ في نهاية الأمر لمحكمة الأسرة بحثا عن حقوقها منه بعد ما تحملته من سنين إهانة وضرب وخيانة من زوجها الذي لم يقدر ما ضحته من أجله ومن أجل أبنائهما.
قالت «نادية» عن زواجها: اتجوزت من 10 سنين والدنيا كانت ماشية وأنا مستحملة المشاكل بينا كانت المشاكل الطبيعية بس، وجبت منه 3 أولاد وعشت عشان أربيهم، وبعد 8 سنين جواز زادت المشاكل في أخر سنتين، الحياة كلها بقت ضرب واهانة وبهدلة.
«نادية»:جوزي بتاع ستات وبيجيبهم البيت من ورايا
أضافت «نادية»: من ساعة ما اتجوزته وهو بتاع ستات وبيجيبهم من البيت من ورايا وكنت بمشي الدنيا واعمل نفسي مش واخدة بالي عشان العيال، لحد ما في أخر سنتين عرفت إنه خطب وهيتجوز علي بعد ما عرف الناس كلها، وبالرغم كده بعد ماعرفت رضيت ومعملتش مشكلة وفضلت مكملة معاه وقلت إنه اتجوز أحسن ما يعمل حاجة في الحرام لكن اللي عرفته بعد كدة هو اللي وجعني وخلاني اسيبه إني اكتشفت إنه بيسرق عفشي اللي أنا جددته من فلوسي وتعبي وشقاي عشان مكنش معاه يجهز بجهاز جديد فكان بياخد عفشي أنا عشان يتجوز التانية بيه لحد ما الشقة فضيت ولما سألته العفش فين كان يقولي بعمل فيه حاجة وهرجعه تاني.
تابعت والحسرة في عينيها على حالها: طول فترة جوازنا كان مبيصرفش كنت أنا اللي بشتغل وبصرف على البيت وعلى العيال صعب علي لما عرفت إنه هيتجوز لأنه كان مبيصرفش علي أنا وولادي ورايح يفتح بيت تاني وبقى في الآخر يديني 500 جنيه على التلت عيال.
أكملت كلامها وقالت: لما اتطلقت منه مخدتش أي حاجة وخد كل حقوقي مني، حتى عفشي لما رفعت قضية عشان أخده رجع لي عفش غير عفشي، ولما لقاني لجأت للقضاء قال نحل ودي كان ناوي ميدنيش نفقة لا لي ولا للعيال لحد مارفعت عليه دعوى نفقة ومبقاش يدفع واتحبس بيها قبل كدة ودلوقتي رافعة عليه قضية بالفلوس المتأخرة عليه.