«طلع حرامي حلل».. نيفين بدعوى نفقة:"المخدرات لحست دماغه وبعت هدومي عشان ناكل"
"أنا مهما اشتغل مش قادرة أكفي أربع عيال" هذا ما بدأت به نيفين صاحبة دعوى نفقة كلامها، من أمام محكمة الأسرة حكت نيفين قصتها المحزنة عن زواجها الذي دام 15 عام من زوج لا يعرف الرحمة ولا يهمه سوى المخدرات ونفسه.
نيفين بدعوى نفقة:"المخدرات لحست دماغه وبعت هدومي عشان ناكل"
تزوجت “نيفين” في عمر الـ 18 زواج تقليدي في بيت عائلة، من أول شهر في زواجها بدأت معاناة نيفين مع زوجها وأهله، عاشت نيفين من أجل أولادها الأربعة حياة صعبة وأليمة حتى وصلت لمرحلة كانت فيها متأكدة أنها إذا استمرت في هذا الزواج سينتهي بها الأمر ميتة.
نيفين:"جوزي كان بيسرق الحلل عشان المخدرات"
روت نيفين قصتها ودموعها تسيل على خديها:" عشت معاه 15 سنه ضرب وحبس وبهدلة، سايبني معايا أربع عيال كنت عايشة مستحملة عشان بقول مين هيستحملني بأربع عيال، كان بيشرب مخدرات من زمان لحد ما بدأ يتعاطى مخدر الأيس، دخل مصحة ثلاث شهور ومكملش علاجه، كنت بشتغل عشان ولادي كنت بصرف عليه واجبله السجاير بالعافية".
تابعت نيفين " كان بيسرق أي حاجة من البيت عشان المخدرات طقم حلل معالق مواعين ملايات أي حاجة يلاقيها قدامه لما اساله يقولي مشفتش حاجة، حاجتي كلها باعها وصلني إني كنت ببيع هدومي عشان أجيب أكل عيالي".
معاملة أهل الزوج الصعبة
حاولت “نيفين” أن تتعايش مع طباع زوجها المستحيلة من أجل أطفالها ولكن ما لم تستطع تحمله هو معاملة أهله لها، مضيفة: " أهله كانوا بيضربوني حماتي كانت بترفع عليا السكينة، حمايا ضربني في أول شهر جواز لأني طلبت أكل وفتحلي دماغي، مكنوش عايزني أشوف حد أوحد يشوفني كانو مانعين أهلي إنهم يجولي أو أروحلهم ".
تذكرت “نيفين” حادث خسارة طفلها: "في مرة كانت عندي واحدة صاحبتي جوزي وابوه استنوها تمشي ومسكوني ضربوني لدرجة إني سقط ومكنتش أعرف إني حامل رحت عند أهلي ارتاح عندهم جوزي جه ضربني عند أهلي لاني سايباه من غير فلوس".
نيفين:"نفدت بجلدي من جوزي"
تابعت نيفين:" في أخر مشكلة بيني وبين جوزي كان عايز فلوس ضربني جامد و خبطني بطفاية فتحلي دماغي وأنا بهرب منه لف الحزام على رقبتي وخنقني وصلني لدرجة كنت هموت، عرفت ساعتها إني لو كملت معاه ولادي هيصحوا في يوم يلاقوني ميته، في نفس اليوم بليل بعتني اجيبله سجاير خرجت بالهدوم اللي عليا ومرجعتش تاني".