أخبار محكمة الأسرة اليوم
دعاء لـ محكمة الأسرة : جوزي طلقني عشان طلبت منه اشتغل واساعده
دعوى نفقة في محكمة الأسرة رفعتها «دعاء» على زوجها والد أطفالها بعد أن طلقها غيابي دون علمها، ولم تكن في نية الزوجة أن تصل لمحكمة الأسرة في يوم من الأيام لكن ما فعله معها زوجها الذي عاشت معه حياة يملأها الحاجة كان سبب تواجدها في المحكمة لتطالب بحقها هي وابنائها.
قصص محكمة الأسرة.. جواز صالونات
قالت «دعاء» في بداية حديثها: «أنا متجوزة بقالي 15 سنة، ومخلفة من جوزي 3 أولاد، كنا متجوزين جواز صالونات، اتقدملي وسألت عليه أنا وأهلي والناس قالوا عليه إنه كويس ومحترم، وفعلا طول الخطوبة والجواز كان كويس وبيتقي ربنا في بيته وولاده».
دعاوي محكمة الأسرة..ظروفه على قده
أكملت كلامها قائلة: «في الأول الحياة معاه كانت كويسة ومفيش مشاكل كان بيغلط كتير بس كنت بعدي عشان مخربش البيت وابهدل العيال، أكبر مشاكلي معاه كانت بس على الفلوس، هو كان شغله على قده وأنا عارفة كدة من زمان، بس في الأول كنت عارفة أتعايش مع ظروفه واحوش واشيل فلوس واستلف عشان البيت والولاد، بس لما العيال كبروا المصاريف زادت ومبقاش قادر على مصاريفهم ولا انا قادرة اني اتصرف تاني».
حكايات محكمة الأسرة..مش راضي يخليني اشتغل
تابعت حديثها قائلة:« حاولت كتير عملت كل حاجة عشان أمشي دنيتي لكن مفيش فايدة، حصل بينا مشاكل كتير جدا بسبب المصاريف، أنا تعبت والعيال تعبوا، لحد ما واحدة أعرفها جابتلي شغل كان كويس جدا، رحت أقله اشتغل عشان أساعد في مصاريف البيت رفض وبهدلني واتخانق معايا ساعتها ومفهمتش عمل كدة ليه»
قضايا محكمة الأسرة.. قضية نفقة
أنهت حديثها قائلة »: فضلت كل ما افتح سيرة الشغل معاه يتعصب ويقولي انتي عايزة تمشي على حل شعرك وانا عايزة اساعد ه، لما ولادي كانوا محتاجين مصاريف المدارس نزلت واشتغلت من وراه، ولما عرف ساب البيت وطلقني من غير ما أعرف، وجيت المحكمة عشان أرفع عليه قضية نفقة لانه من ساعة ما طلقني مسألش في ولاده ولا صرف عليهم جنية».
