أخبار محكمة الأسرة
محكمة الأسرة اليوم.. مريم: صرفت فلوس البيت على الكوافير، وحسن: عايزة تزور أهلها كل أسبوع
ينشر موقع الحادثة، ضمن نشرة أخبار محكمة الأسرة اليوم، أبرز القصص التي نشرت على مدار اليوم الأربعاء، والتي تباينت بين زوجات وصل بهن الطريق إلى أعتاب محكمة الأسرة بحثا عن حقوقهن، وأزواج لم يستطيعوا التأقلم مع زوجات لم يشفع لهن حسن المعيشة.
محكمة الأسرة اليوم.. مريم: صرفت فلوس البيت على الكوافير
طرقت مريم أبواب محكمة الأسر بعد 5 سنوات من الزواج بعدما تصاعدت الخلافات، واستمرت في التفاقم بينهما، وروت أن السبب وراء هذا هو ذهابها للكوافير، وأنهت حكايتها لقاضي محكمة الأسرة بقولها: "جيت في يوم قررت اروح للكوافير وما كانش معايا غير الفلوس اللي سايبها لي بتاعة الشهر، وقررت اروح بيهم الكوافير عشان كلمته قبل كده كتير، وقلت له أنا عايزة اروح الكوافير قال لي لأ، ورحت فعلا وصرفت كل فلوس الشهر عشان زهقت منه ومن بخله، وبعد ما رجعت وعرف إني كنت عند الكوافير وكل الفلوس خلصت ضربني. المشاكل بيننا كترت أوي وأنا ما بقتش قادرة أستحمل أكمل معاه. لما طلبت منه الطلاق رفض؛ عشان كده رفع عليه قضية طلاق بقالي سنة".
محكمة الأسرة اليوم.. حسن: عايزة تزور أهلها كل أسبوع
دعوى نشوز قصدها حسن في محكمة الأسرة بعد خلافات استمرت لسنتين بسبب رغبة الزوجة في زيارة أهلها كل أسبوع، ولكنه يعارض هذا؛ ما جعلها تخرج من المنزل دون علمه، وقال حسن لـ "الحادثة": "متفقين من قبل الجواز إنها مش هتزور أهلها كل أسبوع، بس فجأة غيرت رأيها وبقت عايزة تروح لهم كل شوية، وده كان سبب المشاكل كلها، وفي الآخر كسرت كلامي وراحت من غير موافقتي. لما عرفت إنها خرجت بدون علمي رفعت قضية نشوز، ولما عرفت إني رفعت القضية بعدها بأسبوع كانت رافعة قضية طلاق بتقول فيها إني حارمها من أهلها وعايزة تتطلق".
محكمة الأسرة اليوم.. سهى تطالب زوجها بسداد 21 ألف جنيه
دعوى متجمد نفقة قصدتها سهى في محكمة الأسرة بعد ما تفاقمت المشكلات بينهما؛ بسبب رفض زوجها الإنفاق على ابنته الوحيدة لمدة سنتين، وقالت لـ “الحادثة”: "رفعت عليه قضية متجمد نفقة والقاضي حكم لي بنفقة 900 جنيه كل شهر، وكان متجمد النفقة لمدة سنتين 21 ألف و600 جنيه، بس هو مش راضي يدفع أي حاجة، وعايز يدفع المبلغ بالتقسيط؛ لأنه لو ما دفعش هيتحبس، مش عارفة المحكمة هتعمل إيه معاه بقى".
محكمة الأسرة اليوم.. هدى: بيضربني قدام عيالي
بخطوات مثقلة توجهت هدى نحو محكمة الأسرة تطلب الخلع بعد 23 عاما من المعاناة مع زوجها المدمن الذي كان السبب في خراب استقرار منزلهما، حاولت بكل الطرق إصلاح حياتها، ولكن كان الزوج يتمادى في إدمانه الذي غيب عقله، وأصبح غير مدرك لتصرفاته في التعامل مع زوجته وأولاده؛ ما جعل المشكلات تتفاقم بينهما بسبب المخدرات، واستكملت هدى حكايتها لقاضي محكمة الأسرة قائلة: "حاولت معاه كتير إني أخليه يبطل بس ما عرفتش للأسف، وكنت باقول يمكن ربنا يهديه، بس كان بيزيد كل شوية لحد مبقتش عارفة أتعامل معاه خالص بالذات آخر سنتين، وما بقاش عارف هو بيتعامل إزاي ولا بيقول إيه".
تابع أحدث الأخبار عبر
