أخبار محكمة الأسرة اليوم
سهيلة بدعوى الخلع: صبحني بعلقه لما اتصورت مع ابن عمتي الصغير في الفرح
تواجدت «سهيلة» في محكمة الأسرة وهي تحمل الأسى والندم بسبب زواجها من شخص رفضه جميع أهلها ولم يقبلوا زواجها منه؛ لكنها أصرت على الزواج منه ورأت العذاب في حياتها حتى اضطرت أن تتوجه لمحكمة الأسرة لتنقذ نفسها من الحياة معه.
قصص محكمة الأسرة.. أهلي كانوا موافقين عليه في الأول
قالت «سهيلة» في بداية حديثها: «أنا متجوزة من 3 سنين خلفت من جوزي بنت واحدة بس، اتعرفت عليه في الجامعة هو كان أكبر مني، بعدما عرفته حبيته وكنت عايزة أكمل حياتي معاه، وفعلا اتقدملي وأهلي في الأول كانوا موافقين عليه لما سألوا عليه ولقوه أهله ناس محترمة».
دعاوى محكمة الأسرة.. أمي حذرتني منه
أكملت «سهيلة» حديثها وقالت: «في فترة الخطوبة بدأ يبان على حقيقته واللي خد باله وحذرني منه هما أهلي، أمي قالتلي متجوزهوش كانت شايفة إنه عصبي
وشكاك وغيور ولسانه طويل وهيبهدلني معاه، وأنا كنت زي اللي معميه مش شايفة أي حاجة من الحجات الوحشة فيه لأني كنت بحبه ومش عايزة أسيبه».
حكايات محكمة الأسرة.. ضربني من يوم الصباحية
تابعت الزوجة حديثها قائلة: «كل اللي أمي قالتهولي حصل مسكني ضربني في يوم الصباحية لأن قريبي جه أتصور معايا في الفرح اللي هو ابن عمتي الصغير، بعد الجواز كل حاجة وحشة بانت عليه، العصبية والشتيمة كل يوم، اكتشفت إنه بيشرب حشيش أكتر ما بيشرب الماية، وقلت يمكن لما أحمل وأخلف يتعدل لكن بقى أصعب من الأول ولا بيصرف ولا بيسأل على بنته
قضايا محكمة الأسرة.. عيشت معاه في إهانة وبهدلة
أنهت «سهيلة» حديثها قائلة: «عيشت معاه سنتين في بهدلة وإهانة وفي مرة اتخانق معايا مسكني ضربني كنت هموت فيها، وقتها سيبته وهربت رحت عند أهلي وبنتي معايا، من وقتها كل ما أكلمه عشان يصرف على البنت أو يسأل عليها يشتمني في التليفون ويقولي ملكيش حاجة عندي، لحد ما لقيت مفيش معاه ورفعت عليه جيت المحكمة عشان أرفع عليه قضية خلع ونفقة أنا مش هقدر أرجعله تاني».
تابع أحدث الأخبار عبر
