أخبار محكمة الأسرة اليوم
محكمة الأسرة.. تسنيم: رماني أنا وولادي في الشارع عشان يبيع الشقة
توجهت «تسنيم» لأبواب محكمة الأسرة لترفع على زوجها دعوى تمكين حتى تضمن حقها في مسكن الزوجية؛ لأنها لا تضمن غدر زوجها، فمنذ زواج «تسنيم» وحياتها صعبة مع زوجها بسبب طباعه وأخلاقه المختلفة عنها، وعندما وصل الأمر بالزوج أن يطرد زوجته وأبناءه في منتصف الليل من بيتهم لم تجد الزوجة حلا سوى أن تتوجه إلى محكمة الأسرة حتى تحصل على حقوقها منها.
قصص محكمة الأسرة.. كنت رافضة جوزي أول ما اتقدم لي
قالت «تسنيم» في بداية حديثها: «أنا متجوزة من 2019 وسايبة جوزي بقالي سنة، وخلفت منه ولد وبنت، كان جواز صالونات وأهلي اللي غصبوني عليه، أنا مكنتش عايزة أتجوزه، مكنتش مرتاحة له من قبل الجواز، كان مش شبهي ولا أهله شبه أهلي، بس اضطريت أوافق عشان أهلي ومن ساعة ما اتجوزته والحياة معاه صعبة».
دعاوي محكمة الأسرة.. اتحملت جوزي عشان خاطر ولادي
أكملت «تسنيم» حديثها وقالت: « متبهدلة من ساعة ما اتجوزته ضرب وشتيمة وإهانة بسبب ومن غير سبب، ومبيصرفش على البيت غير على الأد، ده لو صرف أصلا، كان بني آدم صعب وبيغلط كتير وبيشتم ومفيش واحدة تقدر تتحمل تعيش معاه، بس أنا اتحملت عشان خاطر ولادي».
حكايات محكمة الأسرة.. جوزي طردني في الشارع
تابعت «تسنيم» حديثها قائلة: «في آخر فترة جوزي عمل معايا مشاكل كتير بسبب الشقة عايز يبيعها وأنا كنت رافضة؛ لأنها لو اتباعت هنبقى في الشارع والشقة كانت باسمنا احنا الاتنين، اتبهدلت بسبب الشقة دي ضرب وإهانة كل ما أرفض إني أبيع، لحد آخر مرة حصلت بينا مشكلة طردني أنا والعيال من الشقة، محاولش يرجعني بعدها عشان ياخد هو الشقة ويرمينا في الشارع».
قضايا محكمة الأسرة.. اتهجم عليا هو وأهله
أنهت «تسنيم» حديثها قائلة: «لما لقيت مفيش فايدة معاه ومش راضي يحل ودي، رفعت قضية تمكين عشان هو في أي وقت ممكن يطردنا ويرمينا في الشارع، وهو لما عرف إني رفعت قضية التمكين جاب أهله واتهجم عليا واتهموني إني ضربت امه، وبعدها طلقني، كل ده عشان كان عايز يبيع الشقة، وطول الوقت بيكلمني يشتمني في التليفون هو وأهله، ما لجأتش للمحاكم عشان سبوبة، أنا متبهدلة بسببه، ورفعت قضية نفقة عشان ولاده اللي مبيسألش فيهم وهو مش سايب باب للرجوع بعد اللي عمله معايا».
تابع أحدث الأخبار عبر
