أخبار محكمة الأسرة
محكمة الأسرة.. وداد: ضحك عليا وقال لي إنه اتعدل عشان اتنازل وارجع له
دعاوى نفقة في محكمة الأسرة كانت نهاية زواج «وداد»، وكان زوجها هو سبب الوصول لهذه النهاية، فبعد إهانته لزوجته لسنين حاولت الزوجة أن تتخلص منه وتبعد عنه؛ لتنقذ نفسها وأبناءها، لكنها فشلت في محاولاتها؛ بسبب إصراره على عودتهم سويا، واكتشفت في النهاية أن رجوعها له أكبر غلطة ارتكبتها وأن دعاوى محكمة الأسرة هي ملجؤها الوحيد.
قصص محكمة الأسرة.. بان وشه الحقيقي بعدين
قالت «وداد» في بداية حديثها: «أنا اتجوزت من 11 سنة جواز عن طريق المعارف ناس قرايبنا كانوا يعرفوا أهل جوزي وهما اللي قالوا عليه إنه كويس، بعد الجواز خلفت منه بنت وولد، والحياة في الأول كانت زي الفل وعادية، بس كل ده اتغير بعد كده ووشه الحقيقي بان ».
دعاوى محكمة الأسرة.. باتضرب واتهزأ لو طلبت حقي
أكملت «وداد» حديثها، وقالت: «بعد كام سنة جواز المشاكل بقت كتير أوي مع جوزي، كان بني آدم صعب جدا وعصبي ولا يحتمل، على طول بيزعق وبيتخانق بسبب ومن غير سبب، وكان مبيصرفش علينا غير قليل وهو معاه فلوس من شغله، ومقدرش اطلب منه حاجة لأني لو طلبت اتضرب واتهزأ، وفضلنا على الحال ده كذا سنة».
حكايات محكمة الأسرة.. رجعني بعد ما رفعت القضايا
تابعت «وداد» حديثها قائلة: «لحد ما سبت له البيت وخدت العيال، ورفعت عليه قضية نفقة ليا أنا والولاد، ومكنش حاول يرجعني قبل كده، لكن أول ما رفعت القضايا قال لي نرجع وانه مش هيعمل كده تاني وهيصرف علينا ومش هيخلينا محتاجين حاجة وهيوفر لنا كل اللي احنا عايزينه وصدقته ورجعت له للأسف».
قضايا محكمة الأسرة.. رفعت عليه قضايا تاني
أنهت «وداد» حديثها قائلة: «طلع عمل كل ده عشان اتنازل عن قضايا النفقة وميدفعش حاجة، فضل كويس أول كام شهر بس، وبعد كده رجع زي اأول وأسوأ، مبيصرفش، وضرب وبهدلة ليا وللعيال، ومقدرتش اسيبه تاني؛ لأن أهلي منعوني، بس مقدرتش اكمل معاه أكتر من كده، خدت عيالي وسبت البيت ورحت عند اختي لحد ما اشوف لي مكان اقعد فيه أنا وولادي، وجيت عشان أرفع قضايا النفقة تاني. أنا كنت اتنازلت عنها قبل كده لأنه أقنعني انه مينفعش ارفع قضايا على أبو ولادي، ورفعت معاهم قضية خلع عشان اخلص منه».
تابع أحدث الأخبار عبر
