أخبار محكمة الأسرة
سعاد لـ محكمة الأسرة : ساعدته أنا وأهلي والمخدرات لحست دماغه
رفعت «سعاد» دعوى خلع في محكمة الأسرة على زوجها الذي كانت ظروفه المالية صعبة منذ زواجها منه وساعدته ووقفت بجانبه مثل أي زوجة اصيلة وساعده أهلها عندما كان يحتاج المساعدة، لكن في النهاية لم يقدر الزوج المساعدة، وكان إدمانه للمخدرات هو اختياره واضطرت الزوجة أن تتوجه لمحكمة الأسرة لتحصل على حريتها.
قصص محكمة الأسرة..رضيت بظروفه الصعبة
قالت «سعاد» في بداية حديثها :«أنا اتجوزت جواز صالونات من ١٣ سنة، لما جوزي اتقدملي كنت فرحانه جدا ومبسوطة ان هيبقى ليا بيت وعيلة، وده اللي خلاني وافقت عليه على طول، بالرغم من إن ظروفه صعبة لكن قلت مش مشكلة وهقف جنبه ومش مهم،. اتجوزنا وحلفنا ولد وبنت».
دعاوي محكمة الأسرة.. اهلي بيساعدونا وبيقولي اتصرفي
أكملت «سعاد» حديثها وقالت: «بعد الجواز والخلفة الدنيا كانت ماشية كان بيصرف على القد يدوبك، ولو كنت بحتاج زيادة كان أهلي بيدوني ويساعدونا باللي احنا محتاجينه وكانت بتتدبر، لحد في فترة الظروف كانت صعبة اوي ومكنش بيبقى معاه اي فلوس وطول الوقت محتاج وبيقول مش معايا واتصرفي».
حكايات محكمة الأسرة.. صاحب البيت طردنا عشان الايجار
تابعت «سعاد» حديثها قائلة: «لحد ما بقى مش معانا نسدد الإيجار كان عالي ومعهوش فلوس يسدد وصاحب البيت طردنا وقتها أبويا اداني شقة بتاعته عشان نعد فيها، وبعد فترة اكتشفت إن سبب ظروفنا الصعبة دي هي إن جوزي بيشرب مخدرات، لقيتها في جيبه ولما واجهته مأنكرش ولما طلبت منه يبطل وافق لكن وقتها كان بيسكتني بس».
قضايا محكمة الأسرة..ابويا طرده لما ضربني
أنهت «سعاد» حديثها قائلة: «حاولت معاه أنه يبطل لكن مفيش فايدة، فضل مكمل في شرب المخدرات لحد ما مبقيناش لاقيين ناكل خالص، والحياة كانت صعبة معاه وكل ده اتحملته عشان خاطر ولادي ميتبهدلوش، لحد في مرة حصل مشكلة بينا بسبب المصاريف كنت محتاجة فلوس عشان العيال، وضربني وقتها ابويا طرده من البيت لما شافني مضروبة ومن ساعتها معرفش عنه حاجة لحد ما تعبت منه وقررت اخلص منه وارفع قضية خلع».
تابع أحدث الأخبار عبر
