أخبار محكمة الأسرة اليوم
منال لـ محكمة الأسرة : طلقني غيابي عشان ينتقم من أخواتي
رفعت «منال» دعاوى نفقة على والد أطفالها في محكمة الأسرة لرفضه أن يصرف على أبنائه بشكل ودي، بعد تحمل الزوجة لخيانة زوجها وشخصيته الضعيفة أمام أهله وتدخلهم في حياتهم حتى دمروها طلقها الزوج غيابي بسبب خلاف بين الأهالي، واضطرت الزوجة أن تتوجه لمحكمة الأسرة حتى تحصل على حقوقها المادية منه.
قصص محكمة الأسرة..وثقت في جوزي عشان كنا قرايب
قالت «منال» في بداية حديثها: «أنا متجوزة من زمان معايا من جوزي ولد وبنت، أنا وهو كنا قرايب كان ابن خالتي، اتجوزنا ووثقت فيه أنه يكون راجل كويس وإننا قرايب ومفيش منه خوف، والقرايب كانوا سبب أننا سيبنا بعض في الأخر».
دعاوي محكمة الأسرة..بيكلم عليا ستات كتير
أكملت «منال» حديثها وقالت: «حصل بيني أنا وجوزي مشاكل كتير جدا من زمان، كان بيكلم ستات كتير من زمان واتكلمت معاه كتير عشان يتعدل ويبطل اللي بيعمله ده عشان مخربش بيتي مفيش واحدة بتبقى عايزة تخرب بيتها وتبهدل ولادها، كان مبيتعدلش أبدا وكل شوية اسمعه بيكلم واحدة جديدة وطلع يعرف عليا ستات كتير».
حكايات محكمة الأسرة.. اهله بيتدخلوا في كل حاجة
تابعت «منال» حديثها قائلة: «باقي مشاكلي معاه كانت بسبب أهله متحكمين في كل حاجة وبيتدخلوا في كل حاجة في حياتنا، مع أنهم أهلي أنا كمان لكن كانت معاملتهم معايا وحشة، استحملت كتير عشان معملش مشاكل وأخرب بيتي، وأخرتها هو اللي سابني وطلقني غيابي مكنتش أعرف هو قال لصاحبه ومرات صاحبه هي اللي عرفتني».
قضايا محكمة الأسرة..طلقني غيابي ومسألش في
أنهت «منال» حديثها قائلة: «طلقني غيابي وأنا كنت غضبانة بسبب إن أخواته متخانقين مع أخواتي طلقني عشان ينتقم من أخواتي وياخد حق أخواته، سايبنا بقاله 7 سنين رافعة قضايا النفقات بقالي 6 سنين من بعد ما انفصلت عنه بسنة، مكنتش راضية أرفع قضايا عليه في الأول عشان القرابة اللي بينا لكن هو معملش بالقرابة اللي بينا وسابنا أنا والعيال مسألش فينا مش عايز يدفع غير بالمحكمة واضطرني أرفع عليه قضايا نفقة عشان حقي أنا والولاد».
تابع أحدث الأخبار عبر
