أخبار محكمة الأسرة
«دمرها نفسيًا».. سعاد لـ محكمة الأسرة: رامي بنته من 12 سنة ودلوقتي عاوزها
وصلت «سعاد» لمحكمة الأسرة بعد خسارات عديدة شهدتها في حياتها، بعد فشل علاقتها مع زوجها وحدوث الطلاق بينهما حاولت الزوجة أن تحصل على فرصة جديدة لتنال السعادة في حياتها، وعندما ظنت أن حياتها استقرت، خسرت والدتها وتبعها محاولة طليقها أخذ ابتنتها منها، وقصدت الزوجة محكمة الأسرة حتى تعلم ماذا سيحدث في مستقبل ابنتها؟
قصص محكمة الأسرة..كنت عايزة اسببه من زمان
قالت «سعاد» في بداية حديثها :«أنا اتجوزت أول مرة من 15 سنة، كان جواز صالونات وكانت جوازة غلط من الأول كان بني ادم ميعاشرش من ساعة ما اتجوزنا وأنا عايزة اسيبه بسبب تصرفاته وعمايله، بس كملت معاه عشان كله رفض اني اطلق بسرعة، واتحملته عشان الدنيا تمشي وعشان بنتي متتبهدلش».
دعاوى محكمة الأسرة..جايب لبنته عقد في حياتها
أكملت «سعاد» حديثها وقالت: «كان مبيصرفش غير قليل وبيغلط وبيشتم وحتى بنته بيعاملها وحش، بعد 12 سنة زهقت منه ولقيت إن بنتي جالها عقده من الحياة معاه، وقررت أسيبه ومرجعلوش تاني ورحت عند أهلي، ونزلت اشتغل عشان اصرف على بنتي واكفي مصاريفها لأنه طبعًا مبيسألش فيها ولا بيصرف علينا خالص وأنا مش عايزاها تحتاج حاجة».
حكايات محكمة الأسرة..عايز يبهدلنا معاه
تابعت «سعاد» حديثها قائلة: «بعد ما اتطلقنا بفترة اتجوزت تاني، وقتها بهدل الدنيا وكان عايز ياخد البنت مني وتقعد معاه والبنت كانت خايفة جدًا إنها تقعد معاه وتسيبني، ومسبناش في حالنا غير لما عرف إنها هتعيش مع أمي، هو عمل كل ده وقتها عشان عرف إني اتجوزت مع إنه اتجوز وخلف وعاش حياته بس عايز يبهدلنا معاه وخلاص».
قضايا محكمة الأسرة.. رفع قضية ضم أول ما أمي ماتت
أنهت «سعاد» حديثها قائلة: «لحد ما أمي ماتت من فترة، وأول ما مات رفع قضية ضم حضانة لبنتي وهو بقاله سنين ميعرفش عنها حاجة ولا بيسأل عليها ولا بيصرف جنيه ودلوقتي عايز يضم الحضانة لأمه هو، بس عايز يحرمني منها ومش مكفيه كل اللي عمله فيا جيت المحكمة عشان أشوف مصير القضية ايه».
تابع أحدث الأخبار عبر
