لقاء الخميسي: الديانة الإبراهيمية الأساس.. وفيه ناس لطيفة زي الشيخ مصطفى حسني
أكدت الفنانة لقاء الخميسي عدم سماعها لأي شيوخ أو دعاية إسلاميين، موضحة أن الجمهور لا يفضل آراءها الدينية، ودائمًا ما تتعرض للهجوم.
وقالت لقاء الخميسي، خلال استضافتها ببرنامج "أسرار" مع الإعلامية أميرة بدر المذاع على قناة النهار: الديانة الإبراهيمية هي الأساس؛ لأن إبراهيم هو الأساس، والدين يتحدث عن الله واحد مفيش غيره والأديان مختلفوش، وقبل ما يبقى فيه إسلام في مصر كانت مسيحية وقبلها يهودية، دخل عمرو بن العاص بقت مصر مسلمة.
وتابعت لقاء الخميسي: مبسمعش شيوخ بتتكلم عن الدين، ومبحبش أقول أنا مع مين وضد مين، ولكن بحب أسمع النقشبندي، أنا عشت في بلد مش محتاجة حد يشرح لي حاجة، ولما كنت في الإمارات التربية الدينية كان جزء من المناهج ومدرسين الدين كانوا مصريين.
فيه ناس لطيفة زي الشيخ مصطفى حسني
وأضافت: أنا بقرأ بس ومبسمعش لـ حد، سمعت كتير ولكن مش مقتنعة بكل الحاجات، فيه ناس دلوقتي لطيفة زي الشيخ مصطفى حسني مريح وهادي وواعي، ممكن أكون أنا مش محجبة، لكن أنا بحبه، بيديني إحساس السلام النفسي، علاقتنا بـ ربنا مش خناقة.
واستكلمت: فيه ناس بتضايق من آرائي وبيشتموني، لو انت رافض فكرة اتناقش أو ابعد تخطيها، والناس بتشتم تقول انتي متعرفيش ربنا، هل هما عارفين حياتي؟ أنا بعمل إيه في بيتي أو بدعي ربنا بقول إيه؟ حد دخل جوايا أنا صادقة ولا لأ؟ ربنا الوحيد اللي عارف الصدق من عدمه.
واختتمت: علاقتي بـ ربنا أحلى حاجة في الحياة، أنا راضية ومعايا زوج جميل راضي، وكل يوم الصبح بشكر ربنا على كل حاجة.
