ضربها في شهر العسل وربطها في السرير.. ننشر أقوال والد عروس المحلة روان
كشفت التحقيقات في مقتل عروس المحلة على يد زوجها أن الخلافات بينهما ليست بجديدة، ولكن منذ زواجهما سنة 2022 والمشادات الكلامية والمشاجرات لم تتوقف، واستمرت حتى انتهت بمقتلها، وذلك وفقا لأقوال والد عروس المحلة، والذي جاءت أقواله التالي..
س: ما معلوماتك بشأن واقعة وفاة المجني عليها روان محمد؟
ج: اللي حصل إن بنتي متزوجة أحمد عبد الرحمن ومقيمة معاه هنا في المحلة في منطقة الشعبية بقالها سنة وخمس شهور ومخلفة منه طفل عنده خمس شهور والنهاردة حوالي الساعة الثانية عشر ظهرا جالي اتصال هاتفي من احد ضباط المباحث هنا في المحلة بيبلغني اني اشد حيلي، وان بنتي مانت مقتولة وفي حد ضاربها، وان اتعمل محضر واتعرض على النيابة العامة وبلغني أحضر أمام النيابة فأنا جيت أنا وابني عمر على المحلة علي طول عشان نتسئل في القضية.
س: وما هي بيانات ابنتك المتوفاة لرحمة مولاها تحديدًا؟
ج: بنتي اسمها روان محمد، كان عندها 22 سنة، متزوجة من أحمد عبده، ومقيمة معاه في مدينة المحلة في منطقة الشعبية؛ لأنه أصلا من المحلة، بقالها سنة وخمس شهور ومخلفة منه طفل عنده خمس شهور، وهي ربة منزل.
س: ومن أين تعرفت المتوفية لرحمة مولاها التي كانت تقيم برفقتك بمدينة بلقاس على زوجها سالف الذكر؟
ج: هما كانوا زملاء في كلية تربية رياضية جامعة المنصورة من دفعة واحدة، واتعرفوا على بعض في الكلية، واتجوزوا بعد تخرجهم.
س: وعلى أي أساس تتهم زوج عروسة المحلة بالتعدي على ابنتك وقتلها؟
ج: لأن بنتي المباحث لقوها مضروبة في بيتها اللي عايشة فيه مع جوزها وهي وجوزها بينهم خلافات بقالهم سبع أيام، وكل يوم بتتصل بأخوها تشتكي له إنه بيكلم بنات عليها ومش مهتم بيها، وإنه على طول بيضربها وبيشتمها وبيهينها ده بخلاف إنه سبق واعتدى عليها بالضرب المبرح وكان رابطها في السرير ومبهدلها في شهر عسلهم في الإسكندرية، وانا اتدخلت وحليت الموضوع وقلت اصبر عليه وبعد الخلفة أكيد هيهدى ويراعي بيته وفضلت صابر عليه لحد ما قتلها.
س: وما تفصيلات الخلافات التي بين ابنتك المتوفاة وبين زوجها تتهمه بقتلها؟
ج: هو من أول شهر جواز بينهم بيضربها وبيبهدلها لدرجة إنهم وهما في شهر العسل في إسكندرية كان ضاربها ضرب مبرح، لدرجة إنها رجعت بيتها في المحلة متورمة ومتعورة جامد، وعرفت إنه كان رابطها في السرير، واتعدى عليها، ولما قعدت معاه اتصالحنا، وقلت ما أخربش على بنتي في بداية حياتها، وأخدت عليه وعد إنه يعاملها كويس وصالحتهم، وفضلت مدار السنة والخمس شهور تشتكي كل فترة من سوء معاملته، وكانت بتخاف تكلمني وتحكي لي اللي بيعمله، وتكلم عمر ابني تشتكي له عشان كانت عارفة إني لو كنت عرفت إنه رجع ضربها تاني كنت هاطلقها من أحمد جوزها.
مقتل عروس على يد زوجها بسبب الغيرة
وكانت جهات التحقيق بدائرة قسم شرطة ثانٍ المحلة الكبرى بمحافظة الغربية قررت حبس الزوج المتهم بقتل زوجته 4 أيام على ذمة التحقيق معه في قتل زوجته عمدا بطعنها بسكين؛ بسبب خلافات زوجية.
تابع أحدث الأخبار عبر
