احذر .. قضايا نصب وتزوير ممكن تقع فيها آخرها لـ "الدكتور الجامعي"
من امبارح للنهاردة الأجهزة الأمنية أحبطت عدد لافت للنظر من قضايا النصب والتزوير تحديدًا .. فـ ركز معانا في الفيديو ده عشان ما تقعش في الفخ.
أول واقعة معانا عن للأسف هي لدكتور جامعي من القليوبية بيزور شهادات دراسية باسمه منسوبة للجامعات الحكومية والأجنبية، الدكتور ده كان زكي وشوية وكان بيزور الشهادات دي بدرجات علمية مختلفة، وهدفه إنه يتقل السي في بتاعه بالشهادات ورسايل الماجستير والدكتوراه دي عشان يشتغل في الشركات الكبيرة بمرتب عالي.
الدكتور ده فشل مخططه لما كان بيحاول يوثق شهاداته المزروة دي بختم النسر، ولحد الخطوة دي فشلت خطته كلها واتقبض عليه ولقوا معاه كل أدوات التزوير، وفي التحقيقات اعترف بكل التفاصيل.
لما الدكتور يعمل كده تفتكروا الطالب هيعمل إيه؟.. أنا هقولك.
من خلال الفيسبوك بدأ طالب ينصب على الشباب اللي في سنه، واستهدف تحديدا الشباب اللي نفسهم يسافروا، أجر شقة في منطقة الهرم وعملها مقر لشركة توظيف طبعا الشركة كانت وهمية ومالهاش أي أوراق، وأوهم الطالب ده الشباب إنه هيقدر يجيبلهم شغل مناسب في بلاد كتير بره مصر سواء في الخليج أو أوروبا، ومش بس هيلاقيلهم شغل هو كمان هيخلصلهم إجراءات تأشيرة السفر.. وللأسف صدقه عدد كبير من الشباب، وقدر يجمع الطالب يده في فترة قصيرة أكتر من 2 مليون جنيه، وبعده قفل مقر الشركة وكل حساباته اللي استغلها في الترويج لنشاطه واختفى.
طبعا كل الشباب اللي اتعرضوا للنصب اتجمعوا وقدموا بلاغات للشرطة باللي حصل، وفي ساعات قليلة قدرت الأجهزة الأمنية إنها تقبض على الطالب ده وعرفوا إنه في الأساس عاطل عن العمل وكل فترة بيخطط لنشاط إجرامي وينفذه، وعنده معلومات جنائية كمان مطلوب في أكتر من قضية نصب وتبديد.
