رسائل الرئيس السيسي لفتاة الشروق حبيبة الشماع
حبيبة الشماع اسم تصدر الترند اليومين اللي فاتوا.. قصتها شغلت الرأي العام والرئيس عبد الفتاح السيسي تدخل بنفسه ووجه بعلاجها بره مصر لو حالتها استدعت ده.
خليني ابدأ لك القصة من البداية.. حبيبة طلبت عربية توصلها من منطقة التجمع لمصر الجديدة، لكن انتهت الرحلة بمحاولة للخطف ونزيف داخلي وجروح وكسور وحاليا في المستشفى في حالة غير مستقرة.
شركة التوصيل الشهيرة أوبر يمكن معظمنا بيطلب منها عربية توصله بدل التاكسي زيادة أمان.. لكن اللي حصل مع حبيبة الشماع وتر كل عملاء الشركة دي ، طلبت حبيبة العربية عشان توصلها وفي الطريق لاحظت حبيبة إن فيه حاجة غلط.. السواق معلي صوت الاغاني وطول الرحلة بيتكلم في التليفون بصوت عالي وبيزعق، ولما طلبت منه يوطي الصوت أو ينزلها مارضيش، وطلع إزازة من جنبه وبدأ يشرها في الجو.
مالقتش حبيبة تصرف تأني غير إنها تنط من العربية، اللي كانت ماشية في الوقت ده على طريق السويس في مدينة الشروق، ولحسن حظ أهلها إن شافها في الوقت ده راجل كان سايق على نفس الطريق جري عليها وحاول يسألها ليه عملت كده قالت إن السواق كان عايز يخطفها ، وقالت حبيبة الجملة وأغم عليها ، ونقلها الراجل ده للمستشفى وكلم أهلها وبلغهم باللي حصل.
وقالت أخت حبيبة الشماع إنها حاليا في المستشفى بتعاني من نزيف داخلي في المخ، وكسور في أماكن متفرقة في جسمها، ولحد دلوقتي حالتها مش مستقرة.
طبعا أهل حبيبة قدموا بلاغ بالواقعة دي، وفي خلال ساعات قليلة قدرت الأجهزة الأمنية إنها تقبض على السواق اللي قال إنه ماحاولش يخطفها وهي اللي ظنط كده لما طلع ازازة معطر ورش في العربية، لإنه كان شامم ريحة وحشة وهي افتكرت إنه عايز يخدرها فرمت نفسها من العربية.
وعلى الجانب التاني شركة أوبر نزلت بيان رسمي عن الواقعة دي، وطلع المتحدث الرسمي لشركة اوبر يرد على الانتقادات اللي أتعرضولها بسبب الحادثة الأخيرة وقال انهم فيه تواصل مع أهل حبيبة وانهم في تعاون كامل مع الأجهزة الأمنية عشان اللي أخطأ ينال عقابه وأكدت ان ديما الشركة بتلتزم انها توفر رحلات آمنة وموثوقة للي يستخدموا الابلكيشن.
ومن ساعات قليلة تواصل الرئيس عبد الفتاح السيسي مع والدة حبيبة الشماع اللي حكت تفاصيل المكالمة وقالت: بشكر الرئيس السيسي لأنه اتصل بنفسه وقدم كافة المساعدات اللي في الدنيا.. والرئيس السيسي قال أي حاجة نحتاجها حتى لو تسافر برة تتعالج وطبعاً ألف شكر ليه وكتر ألف خيره إن هو اتصل واهتم بالموضوع.
