ابنة نجيب محفوظ تهدي مكتبته لمكتبة الإسكندرية
ام كلثوم بنت الاديب الكبير الراحل نجيب محفوظ ، أهدت مكتبته الخاصة لمكتبة الإسكندرية ، كتمهيد لإتاحتها لرواد المكتبة والباحثين والدارسين ، والمكتبة دي بتضم تقريبا 1500 كتاب بيتنوعوا ما بين رواياته وكتبه وقواميس وموسوعات بتاعت نجيب محفوظ ، أو حد اهداها لي ، واستقبلت أم كلثوم وفد كبير من خبراء مكتبة الإسكندرية بيترأسهم الدكتور أحمد زايد مدير المكتبة ، وبيتقدمهم الدكتور محمد سليمان رئيس قطاع التواصل الثقافي عشان يتمموا إجراءات الاستلام والتسلم بتاعت المكتبة.
قالت ام اكلثوم ، إنها مبسوطة بالخطوة اللي خدتها دي ، وبإهدائها مكتبة باباها لمكتبة الإسكندرية اللي هي بتعتز بيها جدا ، وأنها خدت الخطوة دي بعد زيارتها للمكتبة وازاي شافت طريقة التعامل مع الكتب هناك بشكل احترافي ، كمان انها خدت الخطوة دي ك حرص منها على اتاحة تراث نجيب محفوظ لكل قرانه من كل الاعمار.
والدكتور أحمد زايد مدير المكتبة شكر بنت اديب نوبل ، أم كلثوم نجيب محفوظ ،على الخطوة دي وعبر عن سعادته الكبيرة باليوم التاريخي دا اللي قدر فيه انه يدخل بيت الاديب الكبير نجيب محفوظ ويقلب في مكتبته ويقرا كتبه الخاصة ، وقال إنه بعد ما خبراء المكتبة هيفرزوا الكتب ويصنفوها.. هيتم مباشرة عرضها في مكتبة الإسكندرية بالشكل اللي يليق باسم نجيب محفوظ.. وان هيتعمل بعدها احتفال ثقافي كبير يليق بالحدث المهم دا.. والاحتفال داه يكون بحضور ام كلثوم ورموز ثقافية وفكرية كتير اللي هيتعلن من خلالهم عن كل التفاصيل الخاصة بالحدث دا والصور النهائية اللي هتكون عليها مجموعة نجيب محفوظ بعد ما تخرج للنور تاني بعرضها في مكتبة الإسكندرية.
وأكد زايد ان مقتنيات المكتبة بتكتسب أهميتها الحقيقة من كونها مكتبة اديب نوبل.. ودا عشان في كتب كتير فيها هو موقع عليها بنفسه.. وكتب تانية عليها توقيعات الناس اللي اهدته الكتب دي من كبار الادباء والمفكرين سواء في مصر او في العالم كله.. بالإضافة لشهادات ووثائق وصور شخصية وشرايط فيديو.. وقال ان مكتبة نجيب محفوظ الخاصة هتبقى اكيد إضافة حقيقية لزوار ورواد مكتبة الإسكندرية وهتديهم الفرصة انهم يقربوا اوي من الحياة الشخصية لاديب نوبل العالمي نجيب محفوظ.. وكمان هتدي مساحة معرفية للي ماعرفش او محالفهوش الحظ انه يقرب ويعاشر ادب وفكر نجيب محفوظ كما ينبغي.. وان عظمة ادب نجيب محفوظ بتكمن في انه بتظهرلنا في ان اعماله بتخلينا اكثر وعي وبتاريخنا وبنفسنا وبهويتنا المصرية.. عشان هو ماكنش مجرد روائي بس.. لا كمان كان فيلسوف.. واحنا بنقدر نلمس دا في كل اعماله وخصوصا كتابه "أصداء السيرة الذاتية"
والى جانب كل دا قال الدكتور محمد سليمان رئيس قطاع التواصل الثقافي بمكتبة الإسكندرية ان دا يوم تاريخي مهم هينضم فيه جزء من مكتبة اديبنا الكبير نجيب محفوظ لقائمة مكتبات المجموعات الخاصة لرموز مصر وكبار مفكريها.. زي عبد الرحمن بدوى والسنهورى وهيكل وزويل وغيرهم، وقال إنها هتبقى رقم 57 في قائمة المجموعات الخاصة اللي بتنفرد بيها مكتبة الإسكندرية
وبجانب الإجراءات والمراحل اللي هتتم بعد تسليم المكتبة.. قال الدكتور سليمان رئيس قطاع التواصل الثقافي.. ان خبراء المكتبة هيقوموا باجراءات حصر ومراجعة دقيقة لمحتويات المكتبة اللي بتتضمن تقريبا 1500 كتاب مختلف الاشكال والاحجام والتخصصات.. وكمان بلغاتع كتيرة مختلفة عربية واجنبية.. وقال ان الكتب هتتحط في الأول في غرفة عزل عشان تتبخر وتتعقم لمدة أسبوعين.. عشان يتأكدوا من نضافتعها وخلوها بشكل كامل من أي فطريات او حشرات.. وبعد كدا هيقوموا الخبرا بتصنيفها وتبويبها ورفعها على قاعدة بيانات.. ويرمموا اللي محتاج يترمم منها.. وكمان هيحصروا التوقيعات اللي كانت على كتير منها ومين أصحاب التوقيعات دي..
وقال ان دا في رأيه بيمثل تأريخ لمصر الحديثة بس من خلال كتب واهداءات وملاحظات بخط ايد نجيب محفوظ.. وأضاف انهم هيفضلوا دايما على تواصل مع الأستاذة ام كلثوم بنت نجيب محفوظ عشان تهدي المكتبة شوية من مقتنيات والدها الخاصة.. عشان تتوظف جوا سيناريو العرض بالشكل اللي يسمح بخروجها في احلى صورة تليق بأديب نوبل.. العالمي نجيب محفوظ.
