من قضية حضانة لجريمة قتل .. سر اختفاء مريم مجدي
حالة من الزعل والقلق حصلت على السوشيال ميديا الفترة اللي فاتت بسبب اختفاء مريم مجدي.. البنت المصرية اللي سافرت لسويسرا عشان ترجع بناتها لحضنها تاني بعد ما ابوهم خطفهم.. ابوهم خطفهم؟! غريبة دي !
اتجوزت مريم من شاب معاه الجنسية السويسرية من تسع سنين .. وخلفت منه فاطمة 8 سنين وخديجة 6 سنين.. وبعد مشاكل كتير ما بينهم قرروا الانفصال.. بشرط حضانة البنات تكون معاها هي.. ف حصل مشاكل عالموضوع دا.. ف رفعت عليه دعوة قضائية عشان تاخد الحضانة.. وبالفعل خادتها بأمر من المحكمة واتحكم للاب بس انه يشوفهم وقت ما يعوز.. وفي يوم من الايام اللي الاب بيشوف فيها بناته .. في بداية 2023 كدا .. جهز الاب باسبورات البنات.. وراح واخدهم ومسافر.. طبعا حصلت مشاكل كتيرة جدا بسبب اللي حصل.. وراحت واخدة مريم بعضها وسافرت وراهم.. ورفعت عليه قضية تانية في سويسرا عشان تاخد حضانة البنات.. المحكمة المرادي حكمت بتقسيم عدد الايام ما بينهم لحضانة البنات بالتساوي.. بالاضافة لاقامتها في سويسرا بحكم من المحكمة لحد ما الجهات المختصة في سويسرا تجهز مكان سكن ليها عشان تقدر تنفذ حكم المحكمة في تقسيم الحضانة بينهم ... واتفقوا هما الاتنين الحمد لله على طريقة تربية البنات عشان المشاكل اللي بينهم ماتأثرش عليهم.. تخلص الحدوتة هنا ويرضى الاب بالوضع ونقول الحمدلله وتبقى نهاية سعيدة؟ لا ازاي طبعا ماينفعش...
ودخلنا على سنة 2024 .. وكانوا الاتنين في انتظار الحكم النهائي لقضية الحضانة.. ومين اللي هياخد حضانة البنات.. وفي يوم ماطلعتلوش شمس.. خرجت مريم من الفندق اللي مقيمة فيه عشان تاخد البنات من بباهم زي ما متعودين عادي.. بس دي كانت اخر مرة تظهر فيها مريم.. ومن بعدها اختفت...
في اتهام صريح من اخوها وجهه لطليقها وليد امير.. ان مفيش حد لي مصلحة من اختفائها غيره.. بس بعد مواجهة طليقها.. طبعا انكر انه يعرف عنها اي حاجة.. وقعدنا مش عارفين اي حاجة عنها لمدة عشر ايام.. وفي اليوم العاشر .. نشر اخوها خبر وفاتها والعثور على جثتها بعد قتلها ورميها جنب نهر في سويسرا.. كانت قواضي حضانة وكل واحد فيكو نفسه يبقى البنات معاه بس مش اكتر.. بأي منطق تحولها من قضية حضانة.. لجريمة قتل!! ... انا لله وانا اليه راجعون
