أخبار محكمة الأسرة اليوم
حكايات محكمة الأسرة.. حياة: بيلبس براندات واحنا مش لاقيين الأكل
توجهت «حياة» لمحكمة الأسرة كطوق النجاة الذي تعلقت به بعد معانتها مع زوجها الذي اتسم طبعه بالأنانية والقسوة مع زوجته وأبنائه، فكان يبخل عليهم ولا يصرف على أقل احتياجاتهم ويصرف أمواله على نفسه ويتجاهل احتياجات زوجته وأولاده وعندما تطلب «حياة» من زوجها أبسط حقوقها لم تجد منه سوى القسوة والإهانة وأوصلها بتصرفاته الأنانية لمحكمة الأسرة بحثًا عن حقوقها هي وأولادها.
قصص محكمة الأسرة.. المشاكل بدأت مع جوزي بعد المسؤولية
قالت «حياة» في بداية حديثها: «أنا اتجوزت من 2016 كان جواز صالونات وخلفت من جوزي 3 أولاد كان في الأول كويس ومفيش منه مشاكل والحياة كانت عادية وماشية وهو راجل طبيعي، المشاكل بدأت بعدين لما المسؤولية زادت وبقت كتيرة من ساعتها الخلافات بدأت وكل مادى كانت بتزيد».
حكايات محكمة الأسرة.. بيجيب لبس بـ 7 ألف جنية
تابعت «حياة» حديثها قائلة: «هو كان بيشتغل شغلانة كويسة ومعاه فلوس كويسة بس بيبخل عليا وعلى أولاده، كان بيبقى مش عايز يصرف علينا حتى في الأكل ويقول مش معايا فلوس وبعد كام يوم ينزل يشترى لبس وجزم من براندات أغلى اللبس الجاكت بيوصل ٧ ألف جنية ولما أتكلم معاه يكذب كذبة مختلفة».
دعاوي محكمة الأسرة.. كان هيموتني في ايده عشان طلبت منه فلوس
أكملت الزوجة حديثها قائلة: «كان بيصرف يدوبك على القد وهو معاه فلوس وبيبخل علينا ومش بيدينا حقنا، حصل بينا مشاكل كتير بسبب الموضوع ده، واخر مره اللي سيبته فيها اتكلمت معاه عشان عمايله دي وانه مينفعش الوضع ده حصلت بينا مشكلة وانفعلت مسكني ضربني، وكان بيختقني عشان يموتني الجيران اللي لحقوني في اخر لحظة لما كان هيموتني في ايده خدت ولادي ومشيت ساعتها على طول».
قضايا محكمة الأسرة.. عايش حياته ومبيسألش فينا
أنهت «حياة» حديثها: «من ساعة ما سيبت البيت ومبيصرفش على أي حاجة تخصنا حتى الاكل والشرب والمصاريف العادية ويوم ما بيصرف فلوس يبعت قليل جدًا متجيبش حاجة انا وولادي ملناش حد في الدنيا وابويا لسه متوفى، جيت أرفع قضية نفقة عشان أعرف أخد منه حقي أنا وولادي لأنه عايش حياته ومبيسألش فينا».
تابع أحدث الأخبار عبر
