أنتم مش مكسوفين؟.. انتقادات لاذعة من الجمهور على فيديو كليب أمور بسيطة
انتقادات كتيره اتعرضلها فيديو كليب أمور بسيطة، للفنان هشام جمال وخطيبته الفنانة ليلى زاهر من الجمهورعلى مواقع التواصل الاجتماعي بعد دقايق معدودة من لحظة طرحه، ودا اللي خلى صناع الفيديو كليب يحذفوه من على موقع التواصل الاجتماعي فيسبوك
وكان السبب ورا انتقادات الجمهور للفيديو كليب هو استخدام تقنية الذكاء الاصطناعي في تنفيذه واللي خلى الرؤية غريبة شوية على معظم الجمهور، لانه اغلبه جرافيك وملامح هشام جمال وليلى زاهر فيه غريبة عن الطبيعي، وده اللي خلى المتابعين يكتبوا تعليقات سلبية كتير زي :
أنتم مش مكسوفين؟
هي دي احلام العصر!
طب ما كنتو خليتو الامور بسيطه و معملتوش الاغنيه اصلا
قولو انكم هـ تنفصلو وخلاص تعبين نفسكوو عملين اغنيه توضوح فيها امور بسيطه دي كلها
ورد هشام جمال على الانتقادات للكليب في بوست على حسابه الشخصي في إنستجرام.
وكتب: من ساعه ظهور الذكاء الاصطناعى وانبهار الناس بقدراته والحاجات اللي ممكن يعملها ولكن لان التقنيه دي لسه في بدايتها ف كان بيقابل صناع الاعمال دي عربيا وعالميا حدود معينه ميقدروش يعدوها لسه، ومنها مثلا ان الذكاء الاصطناعي في الكليبات الغنائيه مشكله دايما اه بيغير ملامح وش المغني وبالتالي بيعتبر مش موجود في الفيديو.
احنا قدرنا الحمد لله وبالتعاون مع احد الشركات العالميه المتخصصه في الذكاء الاصطناعي في اوروبا اننا نعمل اول فيديو كليب -في العالم العربي وغالبا في العالم- بكواليتى مرضيه و بدون تغيير ملامح وشوش المغنيين.. شكرا لكل الناس اللي تعبت معايا في التجربه وان شاء الله التجارب الجايه هيحصل تطور اكبر بكتير.
وفي وسط كل الانتقادات اللي اتعرضلها الفيديو كليب تعاملت ليلى زاهر بنوع من أنواع تجاهل الانتقادات لانها مردتش على ولا انتقاد واكتفت بانها تنزل ستوريز عن تشجيع المتابعين ليها على حسابها الشخصي في انستجرام
وفيديو كليب أمور بسيطة هو أول عمل فني بيجمع هشام جمال وليلى زاهر بعد إعلان خطوبتهم بأسابيع، وهو من كلمات: هشام جمال ومحمد ابراهيم، والحان: هشام جمال، و مونتاج: عمر الموجي، وتصحيح الوان: عبد الرحمن محمد، وفكرة واخراج: هشام جمال، انتاج: روزناما ريكوردز.
تابع أحدث الأخبار عبر
