جهاد في دعوى خلع: اديته فرصة عشان العيال وكان بيعذبهم ويموتهم من الضرب
حاولت «جهاد» أن تحافظ على بيتها بكل قدرتها ولكنها فشلت في كل مرة وكان كل أملها أن تعطي أولادها حياة طبيعية لينشئوا أشخاص طبيعيين، لكن عندما وجدت أنهم يتعرضوا للأذى توجهت لمحكمة الأسرة لتنقذهم.
تزوجت «جهاد» وتطلقت منه بعد مدة بسبب ما رأته منه من مشاكل وخلافات وعدم صرفه عليها او على أبنائها، وانفصلت عنه عندما فاض بها الكيل، ولكنه لم يتركها وأقنعها أنه تغير وسيصونها هي وأبنائهم وعادت له على أمل أن تحقق أمل البيت والأسرة، لكن بعد عودتها وجدت نفسها تعيش نفس الحياة الصعبة مع زوجها وفوقها إهانة لها ولأولادها الصغار وقررت ترك زوجها حتى تنقذ أبنائها من العذاب الذي يعيشوه مع والدهم.
معاناة سببها الزوج
قالت جهاد: «أنا اتجوزت من 11 سنة خلفت من جوزي 3 أولاد، من ساعة ما اتجوزته وهو مش قادر يشيل المسؤولية ولا يصرف عليا أو على ولاده، اتحملته وقلت يمكن بكرة يتعدل لكن مفيش فايدة معاه.»
اتطلقت من جوزي بسبب عمايله
تابعت جهاد: «فوق أنه مبيصرفش ولا شايل مسئولية حاجة كان مبهدلني طول الوقت خناقات وبهدلة، كنت بتحمل عشان العيال بس تعبت منه والمصاريف بتزيد وهو بيزيد في طبعه الوحش، قررت اسيب البيت واخد عيالي وامشي واطلب الطلاق، اتطلقنا فعلا وقتها والعيال كانوا معايا»
رجعت لجوزي لما وعدني يتغير
أكملت جهاد: «لما سيبته قلت هرتاح منه لكني كنت غلطانة، فضل ورايا يزن عليا أننا نرجع لبعض اتحايل عليا وقالي نرجع عشان خاطر العيال وعشان نربيهم سوا، رفضت كتير لكن رجعتله في الأخر لما اقنعني نرجع عشان خاطر العيال ووعدني أنه هيتغير، وقلت أرجع عشان العيال يتربوا بينا.»
بيعذب ولادي
أضافت جهاد: «لما رجعتله لقيته متغيرش بقى ضرب واهانة وبهدلة وتهديد طول الوقت فيا أنا والعيال، بقى ينام في البيت وأنا اشتغل وأصرف، عيالي على طول بقوا مضروبين والتعذيب باين عليهم ا بني جسمه لحد دلوقتي لسه معلم بسبب التعذيب، كان بيضربهم عشان يحرق قلبي.»
دعوى خلع
أنهت جهاد كلامها: «لما صعب عليا ولادي خدت حاجتي وسيبت البيت ومشيت، وهو مش راضي يطلق وانا دلوقتي رافعة عليه قضية خلع، فاكر انها زي كل خناقة وهنرجع تاني بس انا مقدرش ارجعله تاني.»
تابع أحدث الأخبار عبر
