«عايشين مع مدمن وحرامي».. فدوى: بيسرق فلوسي عشان يتكيف ويتهم عياله
تكون المخدرات سبب طلاق العديد من السيدات وخراب الكثير من البيوت ولا يقع الضرر على الشخص المدمن، لكن عائلته وكل من حوله هم من يقع عليهم الضرر، حتى تصل قصتهم في النهاية لمحكمة الأسرة رغبة في أن تنتهي رحلة المعاناة التي تحياها الزوجة وأولادها.
فدوى: بيسرق فلوسي عشان يتكيف ويتهم عياله
كانت قصة زواج «فدوى» عادية مثل اي زوجين لكن تحولت حياتها وانتهت بنهاية مؤلمة، كل ذلك بسبب إدمان زوجها للمخدرات وتركه لأسرته وأبنائه دون مصاريف او سؤال وترك نفسه للمخدرات تسيطر عليه وعلى عقله، حاولت «فدوى» بكل الطرق أن تصلح من زوجها فنزلت لسوق العمل بداله وحاولت أن ترجعه عن إدمانه لكن عندما اكتشفت سرقته لها وأن أبنائها ممكن يصبحوا في المستقبل مثل ابيهم قررت أن تتركه فورا حتى تحافظ على مستقبلها وعلى مستقبل ابنائها الغير معلوم بسبب والدهم.
جواز طبيعي وحياة عادية
قالت فدوى: « أنا اتجوزت من 2011 خلفت من جوزي 3 ولاد، الحياة كانت عادية ومفيش بينا مشاكل، كان هو بيشتغل ويصرف على البيت ومش مخلينا محتاجين حاجة، كانت كل طلباتنا متاحة، وهو كان أب كويس والمشاكل بينا كانت العادية زي أي اتنين وكانت بتتحل، مكنتش متخيلة إن في يوم من الأيام دي هتبقى نهايتنا».
عرف طريق المخدرات
تابعت الزوجة:« لحد من سنتين تقريبا بدا يتغير على طول عصبي وينام كتير ومبقاش يعد مع العيال ولا معايا، مكنتش فاهمة ايه اللي حصلوا أو ايه اللي اتغير، فضلت ادور وراه لحد ما عرفت إنه بقى يشرب مخدرات، مش عارفة عرف طريقها منين أو مين اللي خلاه يشرب».
شيلت المسؤولية لوحدي
أكملت فدوى: « معرفتش اعمل ايه لما عرفت انه بيشرب مخدرات، قلت لأهله قالولي عامليه على إنه واحد عيان، حاولت اعالجه واقف جنبه عشان يرجع زي الاول تاني لكني فشلت، بقى مبيشتغلش ومبيصرفش ولا جنيه على العيال أنا اللي بقيت بشتغل وأصرف ومش مخليه ولادي محتاجين حاجة، لحد ما بقيت ألاقي فلوس ناقصة من محفظتي ولما أساله يقولي تلاقي العيال خدوها وأنا عارفة عيالي ميعملوش كده».
دعوى خلع ونفقة
أنهت فدوى كلامها: « لما لقيت ان خلاص مفيش فايدة معاه وإنه هيفضل زي ماهو ومش هيتعالج ووصل بيه إنه بيسرق مرتبي عشان المخدرات، قررت أسيبه عشان خفت على ولادي يطلعوا زيه، ومن ساعة ما سيبته مسألش فيا أنا ولا العيال، حتى أهله جيران ومش بيسألوا فينا ولما طلبت منهم فلوس رفضوا يدوني أي حاجة، وجيت أرفع قضية خلع و نفقة»
تابع أحدث الأخبار عبر
