عائلة الرحاب.. نهاية غريبة والفاعل مجهول | فيديو

في يوم 5 مايو 2018، استيقظ أهالي مدينة الرحاب على جريمة صعبه جدًا، وكانت الجريمة أنهم لقو 5 جثث لأب ومراته وأولاده الثلاثة جوا الفيلا بتاعتهم.

عائلة الرحاب.. نهاية غريبة والفاعل مجهول

قوات الأمن لقت 5 جثث زي مقولنا من أسرة واحدة في الرحاب، والغموض مسيطر على القضية، واتغيرت وجهه التحقيقات من أقوال الشهود لتحريات الأمن وتقارير الطب الشرعي، والضحايا هما رجل الأعمال "عماد "وعنده 56 سنه، ومراته "وفاء "عندها 43 سنه، وأبنائه "محمد" 22 سنه، و"نورهان" 20 سنه، و"عبد الرحمن" 18 سنه.

وقال حد من الجيران إن الفيلا متأجرة، وعرفنا من فترة قريبة إن صاحبها مديون، ولما سمعنا صوت طلق نار مكتوم بلغنا المباحث علشان نعرف ايه اللي حصل ونتطمن، وقال كمان لما المباحث وصلت لقوا جثة الزوجة في المطبخ ومتصابه في رقبتها بطلق نار.

وكمان قال إن المباحث لقت جثة الشاب الكبير على باب الفيلا، أول ما فتحوا الباب لقوا الجثة، تقريبًا كان بيجرى وملحقش يهرب، ولقوا جثة الأب فى وسط البيت وفيه  مسدس جنب إيده، والجثتين التانيين جمب السلم.

وقال شاهد عيان وكان جارهم، إن عبدالرحمن الصغير كان بيعاني من اعاقه في جسمه وكان بيحب ابوه جدا، وقال واحد من قرايب الأسرة إن الأسرة بالكامل الناس كلها تشهد لهم بالاحترام والأخلاق، ان كان في الشغل أو في المدارسة أو في الجامعة، أو المسجد أو حتي الجيم.

وأكد أن الأب فعلا كان بيمر بأزمة مالية بسبب الديون اللي عليه، وخاصة أن ليه فلوس عند بعض الناس الي بيتعاملوا معاه ومش عارف ياخدهم، بس كانت الأسرة في حاله نفسية كويسه جدا.

وقال الشاهد أن الأب مش معاه أى أسلحة سواء مرخصة أو غير مرخصة، لا ومعندوش قلب يقتل نملة أصلا، وقال إن الحادثة كانت في أماكن مختلفه في الفيلا، ووجود السلاح جمب الأب مش دليل كافي على انتحاره، وبعد كده أمرت نيابة القاهرة الجديدة  الي برئاسة المستشار محمد سلامة بدفن الجثث بعد تشريحها وأمرت بتفريغ كاميرات المراقبة اللي في مكان الحادثة.
وقالت التحقيقات الأولية للنيابة: «كان فيه مخده على وش الجاني والخزنة بتاع السلاح كانت واقعه على الأرض، وأن دماء المجنى عليهم كانت متفرقة في الفيلا كلها، وأن فيه دم موجود بعيد عن جثث المجنى عليهم، وده معناه انهم كانوا بيتحركوا او بيحاولوا يهربوا يعني.

وكشفت التحقيقات كمان أن العربية الخاصة بتاع الأسرة متأجره، وأن الإطارات بتاعتها متفرغة من الهوا، وأكد مصدر في النيابة أن صاحب الفيلا قال  فى التحقيقات الأولية ان الأب المستأجر مكنش عارف يدفع إيجار من 3 شهور علشان كان بيمر بمشاكل في شغله، لأنه خسر في تجارته.

وقالت المباحث إن كان جمب الاب سلاح عيار 9ملي وهو اللي استخدم في الجريمة.

وأكدت التحريات الأولية , بعد سماع أقوال جران المجنى عليهم، اتضح أن الاب قتل زوجته وأولاده الثلاثة علشان ظروفه المالية، وأنه كان مستولي على مبالغ مالية ضخمة من ناس بعد اتهام بعض العملاء له بالنصب عليهم فى مبلغ مليون ونص، وده أدى لسوء الحياة الخاصة بيهم في الفترة الأخيرة.

وفرضت الأجهزة الأمنية كردون أمني في المحيط بتاع الواقعة، علشان يتيح الفرصة لجهات رفع البصمات والطب الشرعي علشان يكشفوا غموض الجريمة، واتنقل فريق من نيابة القاهرة الجديدة برئاسة المستشار محمد سلامة علشان يعاين موقع الحادثة ويسمع أقوال الشهود.

وكشفت التحريات، أنه بعد تراكم الأحكام القضائية على رجل الأعمال، بسبب اتهامه بالنصب، أجر فيلا في الرحاب علشان يكون بعيد عن عين الشرطة، وكمان وميطاردوش أصحاب الفلوس اللي استولى عليها، وبعدها حصل الي حصل لكن محدش متأكد إذا كان الأب هو اللي قتل عيلته وانتحر ولا حد تاني اللي عمل كدا. وبكدا تكون انتهت حلقتنا النهاردة استنونا على في حلقه جديدة من ضد مجهول على موقع الحادثة كنت معاكم أنا محمود عبدالله سلام.

تابع أحدث الأخبار عبر