كنت فاكراه شيخ.. «رباب» للقاضي : كان بيحبسني في الحمام ومش بيأكلني
تزوجت «رباب» منذ سنين عديدة من زوجها الشيخ المصلي الذي من الخارج يبدو عليه أنه إنسان يتقي ربه وحسن الطباع لكنه مع أهل بيته رجل قاس ومتحجر القلب لم يتقي الله يوما في زوجته أو ابنته ومازال كل يوم يستمر في عنفه وغضب عليهم وأوصل زوجته لأعتاب محكمة الأسرة.
بدأت «رباب» كلامها قائلة: جوزي كان بخيل جدا بيصرف علينا لكنه بيصرف أقل ماحنا محتاجين عشت معاه سنين كتيرة ومستحملة عشان خاطر بنتي استحملت ضرب وشتيمة على المصاريف، مع إنه شيخ لكن الضرب عنده كانوا أساسي كل لما كنت أطلب منه حاجة ملاقيش غير الضرب والإهانة وأنا مليش حد في الدنيا يقف معايا فمكنش قدامي غير إني استحمله.
قسوة زوج «رباب»عليها وعلى ابنتها
تابعت «رباب» : المشاكل معاه بدأت من زمان أوي أنا ولدت عند أهلي لأنه كان مبياكلنيش وأنا حامل وكان بيضربني، وكنت لما اجيب أكل يقولي روحي عند بيت أهلك وهاتي منهم أكل ببلاش أحسن، سيبته بعد لما تعبت من العيشة معاه والضرب بقى لا يحتمل كنت بتضرب بالحزام والعصاية والمقشة يوميا، مكنتش قادرة استحمل خلاص و دلوقتي رافعة عليه خلع ونفقة.
قاطع «رباب» أثناء حديثها مكالمة هاتفية واتضح أنه زوجها وبان عليها الحزن والغضب وعند سؤالها عن المكالمة أجابت: جوزي جايبني عشان أخد النفقة بطلوع الروح كل ده على 600 جنيه قالي روحي المحكمة وأنا هاجي ودلوقتي بيكلمني يقولي أنا مش فاضي ومش هاجي.
معاناة«رباب»من أجل ابنتها
تابعت «رباب» والدموع في عينيها :بنتي عندها 12 سنة، كان بيضربها واحنا متجوزين وافتكرت لما اسيبه هرحمها من عذابه لكنه بيحكم علي أوديله بنتي بالعافية ياما هيعملي مشكلة وبوصلها عنده وأنا خايفة عليها منه لانه أخد بنتي عشان يشوفها الأسبوع اللي فات ورجعت دراعها وارم لما سألتها طلع ضربها عشان كانت بتلعب بصوت عالي معندوش أي رحمة لا علي ولا على بنته.
تركت «رباب» محكمة الأسرة والدموع على خديها ولم تصرف النفقة الشهرية المطلوبة من زوجها أو النفقة المتراكمة عليه ومازالت تحت رحمة زوجها القاسي الذي لا يريد حتى إعطائها المبلغ البسيط الذي حكمته لها المحكمة به، لتستطيع أن تصرف على ابنتها وتعطيها حياة أفضل، لكن أنانيته وقسوته مازالت تمنعه من أن يرحمهم.
تابع أحدث الأخبار عبر
