بتغير عليه مني.. سها في دعوى خلع: أمه خلته يتجوز وتطيق العمى ولا تطيق تشوفني
دعوى خلع لجأت إليها "سها" بعدما ضج عش الزوجية بالمشاحنات والخلافات التي زرعتها شقيقاته ووالدته فكانت تحاول الزوجة التأقلم ولكن الأمور خرجت عن السيطرة عندما حرضته والدته على الزواج من أخرى.
"عيلته كلها مبتحبنيش" بهذه الكلمات بدأت سها تروي معاناتها مع أهل زوجها التي دامت لأكثر من 10 سنوات بسبب حب والدته الشديد له، أضافت: "اتخطبنا سنتين عن حب عشان كنا بنحب بعض من واحنا في الكلية واتجوزنا وكل الناس كان بتحسدني على حبه ليا بسبب معاملته اللي كلها حنية وطيبة".
تابعت: "كنا عايشين في حالنا ملناش دعوة بحد وكنا الحمد لله مبسوطين جدًا وخلفنا ابننا الأول وكانت كل حاجة تمام، أنا عارفة إن اخواته ومامته مش بيحبوني من ساعة ما عرفوا إنه عايز يتجوزني بس كانوا مبيتدخلوش في حاجة واحنا كل حاجة بنحلها مع بعض".
تغير معاملة الزوج
بدأت معاملة الزوج تتغير معها ما أدى لنشوب مشكلات وخلافات كثيرة، في البداية كانت لا تعرف ما هو سبب تغيره ولكنها لاحظت أن حياتهما تبدلت عندما تدخل أهله في كل الأمور بينهما، أضافت: "اخواته مبيحبونيش بس طالما هما بعيد عني خلاص مكنش هاممني يحبوني ولا يكرهوني بس من ساعة ما بدأوا يتدخلوا في حياتنا وهي باظت وكله كوم وأمه كوم اللي بتكرهني كره العمى عشان بتغير عليه مني وعايزاه يتجوز عليا".
أكملت سها حديثها: "بقى كل ما يبقى في أي خناقة بينا يتدخلوا ويقعدوا يقولوا له دي بتعمل كدا عشان مبتحبكش وانت تستاهل حد أحسن منها، خفت كلامهم يأثر عليه بس كنت بقول هو بيحبني وأكيد مش هيعمل حاجة زي كدا فيا".
تحريض والدته على الزواج من اخرى
أصبح القلق جزء من حياتها بسبب خوفها من أن يتغير عليها الزوج ويتزوج من أخرى مثل ما تريد والدته، أضافت: "لقيته متغير معايا خالص وكل ما أسأله يقول لي مفيش حاجة، لحد ما في يوم كنا قاعدين عند مامته ومن معاملتهم حسيت إن في حاجة غريبة بس طنشت، لقيت مرات اخويا جاية جمبي وبتقولي أمه اختارت له عروسة وخلاص هيتجوزها".
أكملت سها: "سبت البيت وبعد أسبوع عرفت إنه اتجوز فعلًا وطلبت إنه يطلقني بس قالي أنا مش هطلق حد وهتعيشوا معايا انتوا الاتنين، رفضت ورفعت قضية خلع في نفس الأسبوع اللي اتجوز علي فيه".
أسرعت الزوجة لمحكمة الأسرة ورفعت دعوى خلع على زوجها دون تردد بعدما انساق الزوج وراء كلام والدته وتزوج من أخرى، ولا تزال القضية منظورة في المحكمة حتى الآن.
تابع أحدث الأخبار عبر
