الجدة نورا في دعوى ضم حضانة لحفيدتها: «مرات أبوها بتعذبها وبتحرقها بطاسة الزيت»
جلست سيدة على مشارف الستين وقلبها يأكلها على حفيدتها بسبب ما تفعله زوجة والدها بها من ضرب وتعذيب يصل لحد الحرق ما جعل الجدة نورا تلجأ لمحكمة الأسرة وترفع دعوى ضم حضانة للحفاظ على حياة حفيدتها التي لا تتخطى العشر سنوات.
«بتعذب البنت كل ما تروحلها».. بدأت الجدة تروي معاناة حفيدتها مع زوجة الأب التي تعذبها، أضافت: «بنتي كانت متجوزة راجل كويس جدًا قبل الجواز وكان محترم بس فجأة اتغير من أول الجواز وبقى يضربها ويتخانقوا كتير لحد ما جت في يوم قالت إنها مش قادرة تستحمل وعايزة تتطلق».
تابعت: «وفعلا اتطلقت منه في السنة التانية من الجواز بعد ما خلفت بنتها وكانت عندها تلات شهور وجت تقعد معايا هي وبنتها بس بعد 3 سنين بنتي اتجوزت وسابت بنتها عندي وأنا اللي بقيت أربيها وطليقها برضو اتجوز وبقى عايز ياخد البت هو اللي يربيها، خدها وهي عندها 8 سنين».
تعذيب مرات الأب للطفلة
اشتكت الطفلة لجدتها أنها يتم تعذيبها من قبل زوجة الأب، في بداية الأمر الجدة لم تصدق حفيدتها ولكن حينما وجدت علامات أثر الضرب والتعذيب أدركت أن كلام الطفلة كله صحيح، أضافت: «أول ما أبوها خدها عشان تقعد معاه بدأت البت تقولي إن مرات أبوها بتضربها في الأول مصدقتهاش بس بقيت أشوف علامات مكان الضرب على دراعها وجسمها كلها، كلمت أبوها اتخانق معايا وقالي دي بتعاملها أحسن معاملة».
الجدة تابعت: «اكتشفت إنها قدامه بتعاملها كويس بس أول لما ينزل تبدأ تضربها وتقعدها من غير أكل وبتخليها تنام في الشتاء على الأرض من غير غطا، فالأول كنت بقول يمكن البت بتعمل حاجة غلط عشان كدا بتضربها، بس لما لقيتها زادت في الضرب وكل لما أكلم أبوها يقولي هي مبتعملهاش حاجة قولتله أنا هاخد البت تقعد معايا».
أكملت الجدة نورا حديثها وعينيها مليئة بالدموع حزنًا على حفيدتها: ♫أبوها قالي أنا مش هخليها تضربها تاني والبت فضلت عندهم وأخر مرة جت لي لقيت دراعها محروق بقولها إيه دا قالت لي مفيش حاجة لاقيتها خايفة تتكلم قولتلها قولي متخافيش لقيتها بتقولي مرات أبويا حرقتني بالزيت وقالتلي مقولش لحد عشان لو قلت هتعمل فيا كدا تاني».
لجأت نورا لمحكمة الأسرة لرفع دعوى ضم حضانة لإنقاذ حفيدتها من تعذيب زوجة الأب، ولا تزال القضية منظورة حتى الآن.
تابع أحدث الأخبار عبر
