أشهر تحديات الموت على تيك توك.. القفز من المركب ولعبة الوشاح
تقاليع جديدة وتحديات غريبة بيمارسها أشخاص كتير على تيك توك، بعضهم من مشاهير التطبيق، وفي منهم بيحاول يعمل التحديات دي بغرض الشهرة، وفي ناس تانية بتبقى عاوزة تثبت لنفسها أنها تقدر، لكن معظم التحديات دي بتنتهي بالموت، أو إصابات خطيرة.
وفي تقليعة جديدة، انتشر بين مستخدمي تطبيق تيك توك تحدي قاتل، اتسبب لحد دلوقت في موت 4 أشخاص اتكسرت رقبتهم وهم بينفذوا التحدي دا، وطبعا كل دا كان مصور.
فكرة التحدي الجديد، هي انك هتنط من قارب وهو بيجري بسرعة جنونية، ونشر كتير من المستخدمين فيديوهات لشباب وفتيات نفذوا القفزة المميتة دي من مؤخرة سفن وقوارب أثناء تحركها بسرعة عالية.
يعني لو عاوز تشارك في التحدي، كل اللي عليك، إنك هتروح لمؤخرة القارب اللي هتنفذ منه القفزة المميتة، وهتنط بطريقة بهلاونية، والقارب بيتحرك بسرعة عالية، بس ذنبك على جنبك بقى، تكون كاتب وصيتك وعامل حسابك انك ممكن تروح فيها.
وفي ولاية ألاباما الأمريكية، قال مسئولين، إن البدعة دي جديدة، وكاتن السبب في موت 4 أشخاص لحد دلوقت، وكلهم أصيبوا بكسر في الرقبة.
التطبيق طبعا مليان لقطات لمشاهد جنونية لأشخاص بترمي نفسها في الميه من مؤخرة القوارب سريعة الحركة.
لكن التحدي الجديد دا مكانش الأول من نوعه، في برده تحدي فقدان الوعي، أو لعبة الوشاح زي ما بيسميها شباب تيك توك، وفيها بيقوم المتحدي بحبس نفسه في غرفة معتمة، وبيلف وشاح على رقبته عشان ميقدرش يتنفس، وقبل ما ينفذ التحدي دا، بيقوم بتثبيت التليفون في مكان ما لتصويره خلال التحدي، والموضع داب يتسبب في الإصابة بالإغماء وفي بعض الأحيان بفقدان الحياة.
وحذرت سيدة اسمها لورين كيتنج، ابنها مات قدام أصحابه أثناء قيامه بـ"تحدي التعتيم" على تطبيق تيك توك آباء زملائه، بعد أن كشف صديق ابنها أنه عاوز يكرر لعبة الاختناق بعد ما شافها على تيك توك، وادعت أن أصدقاء ليون كانوا بيشفوه وهو يقوم بالتحدي عبر Facetime عندما وقعت المأساة.
وأضافت الأم: "أخبرني أحد أصدقاء ليون أنه كان يقوم بالتحدي معهم على Facetime بعد رؤيته على تيك توك" وقالت: "ربما اعتقد ليون وأصدقاؤه أنها كانت مزحة لكن ليون لم يعد".
الرمي في الهواء
نيجي بقى لتحدي الرمي في الهواء، والقصة دي بيحصل فيها أن مجموعة من الأشخاص بيعملوا دايرة، وبيخلوا راسهم لتحت شوية بحيث يبقى باصين على الأرض، وبيرموا حاجة في الهواء، ولا يُسمح لأي شخص في الدائرة أنه يتحرك إلا بعد الجسم ما يقع على شخص منهم، وطبعا لكم ان تتخيلوا أن الشيء دا، ممكن يكون عبارة عن كرة صغيرة أو أشياء أكبر مثل دراجة، وفي العادة بتقع على رأس أو رقبة واحد من الواقفين، والهدف من التحدي، هو إصابة الشخص اللي هيقع عليه الجسم دا بارتجاج في المخ.
والتحدي دا تقريبا قريب من التحدي بتاع كسر الجمجمة، وهو في العادة بيتطلب أكتر من 3 أشخاص، بيقف واحد منهم في النص، وبينط في الهوا، وقبل ما يقف على رجليه تاني، الباقيين بيضربوه في رجليه علشان يقع على الأرض، والتحدي دا اتسبب في إصابة شباب كتير بكسر في الجمجمة وارتجاج في المخ.
تحدي كيا المميت
التحديات الدموية على تيك توك، وصلت لحد وفاة 4 مراهقين في حادث سير، ودا حصل لما كانوا بينفذوا "تحدي كيا"، وفيه بيقوم ويقوم المتحدين بمشاركة مقاطع فيديو لسرقة سيارة باستخدام سلك شحن USB فقط، ومفك.
وفي مدينة بوفالو بنيو يورك، فإن سيارة من نوع "كيا" كانت تقلّ 6 مراهقين، تحطمت ما تسبب بوفاة 4 منهم.
وأشارت تحقيقات الشرطة إلى أن المراهقين سرقوا سيارة "كيا" بعد مشاركتهم في التحدي المنتشر على "تيك توك" منذ الصيف.
وبحسب الشرطة حقق التحدي الخطير شعبية كبيرة على "تيك توك"، حتى ان تلت حوادث سرقة العربيات اللي حصلت من وقتها مرتبطة بتحدي "كيا"
أما شرطة لوس أنجلوس فقد أكدت أن التحدي تسبب في ارتفاع معدل سرقة سيارات "كيا" و"هيونداي" بنسبة 85 % مقارنة بالعام الماضي.
