لغز فندق سيسل الملعون اللي بيدخله مبيخرجش منه تاني
في 26 يناير 2013، قررت إليزا لام واللي كان عمرها في الوقت 22 سنة، أنها تسافر تستكشف كاليفورنيا، وبدأت رحلتها بالبحث عن غرفة للإقامة فيها، ووقع اختيارها على فندق سيسيل الفاخر، ووصلت فعلا ودخلت الفندق لكن الغريب أنها مخرجتش منه تاني، والناس قعدت تدور عليها ومحدش عارف هي راحت فين.
"بعد اختفائها بـ 3 أسابيع، بداء الناس اللي في الفندق يشتكوا من ضعف ضغط الميه، وطعمها الغريب، وبعد الفحص الدقيق لقوا جثتها في خزانات الميه، ومحدش عرف وصلت هناك أزاي، ولما راجعت الشرطة كاميرات المراقبة في الفندق كله، لقو حاجات غريبه وغامضه بتحصل ليها، الكاميرات جابتها وهى جوه الأسانسير، وكل شويه تروح على دور مختلف في نص الليل، كل شوية تدخل وتخرج من المصعد، وتدوس على الازرار بشكل غريب وهستيري، زي ما تكون بتهرب من حد أو عاوزه تستخبى من حد.
و"قالت الشرطة أن ممكن يكون عندها اضطراب نفسى عقلي، أو كانت تحت تأثير المخدرات، لأنها كانت بتتصرف بشكل مش طبيعي قبل كدا".
حيث انتشر الفيديو على وسائل التواصل الاجتماعي، حتى أن في ناس شكو أنها دخلت لعالم الاشباح، لكن كل ده مكنش بيفسر أزاي طلعت للسطح، ودخلت جوا خزانات الميه، رغم أن الدور ده بيتطلب دخوله مفتاح خاص، بالإضافة إلى أن مفيش حد فى حجمها يقدر يرفع غطا الخزانات، لانها تقيله اوى وكمان مقفوله كويس.
ولحد دلوقت محدش قدر يكتشف هل دي جريمة قتل أو حادثه أو انتحار.
لكن طبعا دي مكانتش الحادثة الوحيدة اللي حصلت في فندق سيسل، لأنه في بداية الثلاثينيات من القرن اللي فات، اتقتل راجل برا الفندق بسبب عربيه نقل كبيره، وفى نفس السنه انتحر راجل عنده ٤٦سنه بالسم في نفس الفندق.
وبعد ٨ سنين انتحر بحار عنده ٣٩سنه بنفس الطريقة ، وفى سنه ١٩٤٤وحده ست رمت ابنها حديث الولادة من الشباك .
وبعدها بفتره وحده اسمها كريس ماركو وقعت من السطح وماتت، وفضلت حالات الانتحار، والموت غير المبرر دا شغاله لحد الستينيات القرن الماضي ، وفى سنه ١٩٦٢ نطت بولينا اوتون من شباك الدور التاسع بعد مشادة كلامية مع جوزها، لكن هل الموضوع انتهى بكدا، لا دي وقعت على رجل مسن وماتوا الاثنين مع بعض.
أما بقى سنه ١٩٦٤ لقوا ست ميته فى اوضتها وقبليها اتعرضت للاعتداء والنهب، وفى نفس الفندق دا فى التمانينيات عاش قاتل متسلسل اسمه ريتشارد راميريز، وفي التسعينيات عاش فيه برده قاتل نمساوي متسلسل اسمه "جاك".
وبعد فتره من حادثة "إليزا لام" تم اغلاق وبيع الفندق.
“القصص المرعبة دي موجودة في أماكن كتير، لو حصلتلك حاجة زي كدا ممكن تكتبهالنا في التعليقات، خلصت حلقتنا النهاردة واستنونا في حلقات جديدة على منصات الحادثة”.
تابع أحدث الأخبار عبر
