من قتل عالمة الذرة سميرة موسى؟.. حلقة جديدة من "اغتيالات" على موقع الحادثة
نشر موقع الحادثة، حلقة جديدة من برنامج "اغتيالات" على منصة يوتيوب، وتطرق البرنامج إلى تفاصيل اغتيال المصرية سميرة موسى، وقال أحمد خالد مقدم الحلقة، إن يوم 19 أغسطس سنة 1952 جريدة المصري أعلنت خبر على لسان المتحدث الرسمي باسم السفارة المصرية في واشنطن بان سميرة موسي الطالبة المصرية اللي كانت رايحة تدرس في الولايات المتحدة اتقتلت في حادثة عربية.
الحادثة دي أثارت جدل كبير وقتها وسميرة قالت قبل الحادثة بأيام انها بتستعد عشان تعمل أبحاث مهمة بعد ما سمحوا ليها بزيارة المعامل السرية لبحوث الذرة في أمريكا، وده اللي زود الشكوك أكتر على انه اغتيال مش حادثة طبيعية.
واللي مايعرفش مين سميرة موسى فهي بنت ريفية اتولدت في 3 مارس سنة 1917 وعاشت في قرية اسمها سنبو الكبري التابعة لمركز زفتي محافظة الغربية، واتنقلت للقاهرة وهي عندها 10 سنين في مدرسة قصر الشوق الابتدائية بعد كدة مدرسة بنات الأشراف الثانوية الخاصة وكان والدها استقر معاها في القاهرة وفتح فندق بعد كدة اسمه وادي النيل في العتبة.
ولما كبرت سميرة شوية وبقى عندها 16 سنة ألفت كتاب في الجبر، واعٌتمد الكتاب من وزارة المعارف.
واختارت سميرة تكمل دراستها كلية العلوم قسم الفيزياء بالرغم إن مجموعها كان يخليها تدخل كلية الهندسة، بس كان هدفها واضح من البداية وعارفة هي عايزة ايهه، وقدرت انها تحقق نجاحات كبيرة في الكلية وتبهر دكاترتها وساعدها ووقف جمبها الدكتور على مصطفي مشرفة
وسنة 51 جه لسميرة موسى دعوة من برنامج فولبرايت عشان تزور الولايات المتحدة، وكمان كان قدامها الفرصة انها تزور المعامل النووية في جامعة سان لويس عشان تعمل ابحاث في معاملها.
بعد الزيارة دي قالت سميرة موسى إنها استفادت جدا من وجودها في أمريكا وخصوصا بعد ما زارت المعامل اللي هناك.. وجالها عروض كتير عشان تفضل في أمريكا وتكمل أبحاثها وطبعا كانوا هيوفرولها كل الإمكانيات المادية والعلمية.. عروض بالنسبة لأي حد ماتترفضش..
بس سميرة موسى كان ردها واضح وهو إن بلدها مستنياها وإن لو المعامل اللي موجودة في أمريكا لو كانت موجودة في مصر كانت هتعمل حاجات كتير
والحاجات الكتير اللي تقصدها انها هتقدر تخترع جهاز بيفتت المعادن الرخيصة لـ ذرات عن طريق التوصيل الحراري للغازات وده هيخلينا نقدر نصنع قنبلة ذرية رخيصة في التكلفة
بس قبل ما ترجع مصر جالها دعوة تزور مفاعل نووي في ولاية كاليفورنيا، والطريق للمعمل كان جبلي وظهرت فيه مرة واحدة عربية نقل خبطت العربية اللي فيها سميرة موسي ووقعت العربية من فوق جبل ارتفاعه 400 متر.
السواق اللي في العربية كان هندي.. نط من العربية قبل ما تقع بثواني قليلة جدا واختفى ومبقاش ليه أي أثر.. والتحريات بعدها اتثبت ان السواق كان قايل اسم مستعار وان اصلا ادارة المفاعل مبعتتش حد عشان يجيب سميرة موسي للمعمل.
تابع أحدث الأخبار عبر
