محكمة الأسرة اليوم
شروق لـ محكمة الأسرة : أهله طفشوني عشان يجوزوه قريبتهم
دعوى خلع ونفقة رفعتها «شروق» في محكمة ولم تكن تعلن أبدا عندما اختارت زوجها لتكمل معه حياتها أن هذه ستكون نهايتها، لكن تأتي الرياح بما لا تشتهي السفن كان كل خطأ الزوجة في الحياة هو الزواج في بيت عائلة وتحملها لمعاملة أهل زوجها السيئة التي كانت تعلم سببها من البداية، لكن تحملت وعاشت من أجل أن تعيش حياة مستقرة مع زوجها لكن تدمرت حياتها في النهاية.
قصص محكمة الأسرة..جواز عن حب
قالت «شروق» في بداية حديثها: «أنا متجوزة من 8 سنين وخلفت من جوزي بنت وولد، أنا وهو اتعرفنا على بعض عن طريق ناس صحاب، عرفته وحبيته وكان كويس جدا ومحترم ومفيش منه مشاكل خالص، اتجوزنا بعد قصة حب 3 سنين، اتقدملي والدنيا كانت كويسة ومفيش مشاكل في أول سنة».
دعاوي محكمة الأسرة.. مشاكل بيت العيلة
أكملت كلامها قائلة: «لما اتجوزت كنت متجوزة في بيت عيله، فهمني إنه محدش هيبقى ليه دعوة بينا وهنكون في حالنا ملناش علاقة بحد، وأنا صدقته بس كنت غلطانة، أهله عملوا معايا مشاكل كتير جدا بسبب ومن غير سبب، هما كانوا مش بيحبوني عشان كانوا عايزين يجوزوا جوزي لواحدة يعرفوها من البلد، وكانوا بيعاملوني وحش لأني مش من بلدهم».
حكايات محكمة الأسرة..شفت معاهم الويل
تابعت حديثها قائلة: «عشت طول فترة جوازي في مشاكل بسبب أهله هو شوية كان بيقف معايا بس كتير كان بيقف مع أهله، اتحملت كتير عشان مخربش بيتي وعشان خاطر ولادي، بس تعبت منهم بقوا يقولوا في وشي احنا بنطفشك عشان نجوزوا قريبتهم، لما مشاكل الأهل كترت ومقدرتش اتحمل سيبت البيت قلت يمكن يجي يصالحني بس سابني ومسألش فيا من ساعة ما مشيت».
قضايا محكمة الأسرة.. قضية خلع ونفقة
أنهت حديثها قائلة: «حاولت أرجع لجوزي لأني لسه بحبه بس مفيش فايدة معرفتش أرجع من أهله وعرفت أنهم خلوه يخطب، معرفتش أعمل ايه، وبقى لازم إني أجي المحكمة عشان أرفع عليه قضية خلع ونفقة عشان حقي وحق ولادي اللي جوزي مبيسألش فيهم».