أخبار محكمة الأسرة
محكمة الأسرة.. سمية: أخته العقربة هي سبب خراب بيتي
منذ انفصالها عن زوجها أصبحت محكمة الأسرة هي ملجأ «سمية» الوحيد؛ لكي تحاول أن تحصل على نفقتها ونفقة ابنتها، ولم تكن المحكمة اختيارها الأول، لكن رفض زوجها الإنفاق عليها بشكل ودي، ولم يترك لها أي اختيار.
قصص محكمة الأسرة.. تاعبني من يوم ما خدته
قالت «سمية» في بداية حديثها: «أنا متجوزة بقالي زمان، اتطلقت وبنتي عندها 6 شهور، دلوقتي عندها 15 سنة، ما كملتش غير سنتين جواز واتطلقت، من يوم ما خدت جوزي وهو مبهدلني على كل حاجة مصاريف وأكل وشرب وكل حاجة، هو كان موظف وظروفه على قده، بس كنت باستحمله عشان جوزي ولازم أقف معاه».
دعاوى محكمة الأسرة.. أخته سبب خراب البيت
أكملت كلامها قائلة: «فوق بهدلة جوزي ليا كانت أخته عايشة في بيت جنبي، كانت مطلقة وقاعدة يولادها، وطول الوقت بتعمل مشاكل معايا ومع ولادي، وهو طبعا كان بيقف مع اخته ومع ولادها عشان فاكرها غلبان،ة لكن هي كانت سبب خراب البيت».
حكايات محكمة الأسرة.. بيهددني يرميني في الشارع
تابعت حديثها قائلة: «فضلت عايشة وماشية على ظروف جوزي ومقدراه، بس هو كان بيعايرني ويشتم ويضرب لو طلبت منه فلوس زيادة، كان على طول بيهددني إني هبقى زي اخته المطلقة، هيرميني في الشارع واتبهدل زيها. استحملت كتير، بس هو ما كانش بيصرف على البنت خالص، وكانت هتموت مني. رحت عند أهلي ومن ساعتها ما رجعتلوش».
قضايا محكمة الأسرة.. طلقني عشان مخدش النفقة
أنهت سمية حديثها قائلة: «أنا وأهلي حاولنا معاه إنه يصرف علينا من غير مشاكل، لكن أخته كانت مقوماه وخلته يصمم ما يصرفش علينا، ومن ساعتها وانا في المحكمة، الأول رفعت عليه قضية نفقة زوجية ليا، وطلقني غيابي لما المحكمة حكمت لي إني آخد نفقة زوجية، وقتها اشتغلت وصرفت على بنتي، بس بعد ما المصاريف زادت عليا رفعت عليه قضية من سنة واحدة بس واتحكم لي بفلوس قليلة، وهي 400 جنيه، وجيت المحكمة عشان أرفع عليه زيادة نفقة».