أخبار محكمة الأسرة اليوم
«مقضيها مع جارتنا».. لمياء تستغيث بمحكمة الأسرة: بهدلني عشان خاطر كشفتهم
الخيانة سبب دعوى نفقة التي رفعتها «لمياء» على زوجها في محكمة الأسرة، وكان سبب تواجدها في المحكمة هو أن زوجها الذي ظنت أنه سيكون سندها وضهرها في الدنيا خانها مع جارتهم، وبدلًا من أن يشعر بالذنب على فعلته أهانها وضربها عندما واجهته بخيانته مما جعلها تتوجه لمحكمة الأسرة.
قصص محكمة الأسرة.. طول عمره كويس معايا
قالت «لمياء» في بداية حديثها: «أنا متجوزه بقالي 11 سنة وكان جواز صالونات، جوزي كان راجل كويس جدا وعمري ما شفت منه حاجة وحشة، تقدم لي وأهلي سألوا عليه وطلع محترم وأهله ناس كويسة، وكل سنين جوازنا عمره ما غلط فيا ومكنتش أتوقع إنه يعمل حاجة وحشة معايا ولا غلط فيا أبدا».
دعاوي محكمة الأسرة.. طلع بيشرب مخدرات
أكملت «لمياء» حديثها وقالت: «لحد من سنتين تقريبا اكتشفت إنه بيشرب مخدرات وقتها حاولت معاه إنه يبطل، وكان بيقولي إنه مبقاش يشرب بس كان بيكدب عليا وأنا معرفش، وكنت بسكت وأعدي وأقول معلش بكرة يتعدل وكفاية مش مخلي بيته وولاده محتاجين حاجة، كنت فاكرة إن المخدرات هتبقى أكبر مشاكلنا لكن اللي شوفته منه بعد كدة كان أصعب بكتير».
حكايات محكمة الأسرة.. طلقني عشان جارتنا
تابعت «لمياء» حديثها قائلة: «من فترة اكتشفت إنه يعرف عليا واحدة، طلع يعرف عليا جارتي كان بيكلمها في التليفون وعرفت لما شفت تليفونه وبيكلمها، ولما رحت أتكلم معاها زعل جدًا ازاي أكلمها وأحرجها قدام أهلها ضربني وبهدلني كانت أول مرة في حياته ورمى عليا اليمين، كل جه عشانها».
قضايا محكمة الأسرة..بيقفل التليفون في وش ولاده
أنهت «لمياء» حديثها قائلة: «بعد ما طلقني ما صدق رماني أنا وعيالي ومبقاش يصرف عليا ولا على ولاده ولا يسأل عليهم، واضطريت في الأخر أجي المحكمة عشان حقي أنا وولادي، مش عارفة إيه اللي قلب حياتنا كدة، بس هو عايش حياته ومبيسألش فيا ولا في ولاده اللي ملهمش ذنب بيكلموه في التليفون بيقفل في وشهم».