أخبار محكمة الأسرة اليوم
انا لو ليا بنت مرضلهاش الحال ده.. سعاد لقاضي الأسرة: ابني يستاهل مراته تخلعه
من المعتاد أن تتواجد الأمهات مع بناتها في محكمة الأسرة ليقدموا لهم يد العون والمساعدة، لكن تواجدت «سعاد» مع زوجة ابنها بعد ما وجدت أن حياتها مع ابنها صعب تحملها بسبب إدمانه للمخدرات، ووقفت السيدة «سعاد» مع الحق وساعدت زوجة ابنها في الصرف على أبنائها وفي النهاية ساعدتها في رفع دعوى خلع عليه في محكمة الأسرة حتى تعيش حياة طبيعية.
قصص محكمة الأسرة.. كويسة هي وأهلها والجواز تم بسرعة
«اللي مرضاهوش لبنتي مرضاهوش لمرات ابني وأنا جاية مع مرات ابني هي اللي رافعة قضية خلع على جوزها اللي هو ابني» كان هذا أبز ما بدأت بدأت به «سعاد» حديثها وتابعت قائلة: «ابني ومراته متجوزين بقالهم 4 سنين عندهم ولد وبنت، وكان جواز صالونات ناس عرفونا عليها وعلى أهلها وكانوا ناس كويسة ومحترمين ومفيش منهم مشاكل الجواز تم بسرعة ومن غير مشاكل، وفي أول الجواز مكنش فيه مشاكل المصايب معاهم بدأت من سنة ونص تقريبا».
حكايات محكمة الأسرة.. المخدرات هي اللي بوظت حياته
أكملت «سعاد» حديثها قائلة: «المشاكل بدأت من سنة تقريبا لأنه بقى يشرب مخدرات، وبقى مش عايز يصرف على العيال أي حاجة وفلوسه للمخدرات بس هو قبل كدة كان كويس ومفيش منه مشاكل المخدرات هي اللي خلته عامل كدة، هما كانوا قاعدين معايا في نفس البيت هي في شقتها فوق وأنا في شقتي تحت وبخلي بالي منهم وبصرف عليهم اللي محتاجينه لأن هو مبيصرفش خالص».
دعاوي محكمة الأسرة..اللي مرضاهوش لبنتي مرضاهوش لبنتي
أضافت الأم والحزن في عينيها: «حاولت معاه كتير إنه يتعدل لكنه بيشرب ويعدل دماغه ومبيسألش في حد، وأنا اللي بصرف على العيال في أكلهم وشربهم وكل حاجة وقاعدين معايا وبقيت أنا اللي بصرف على العيال وعليه، لحد ما جت قالتلي عايزة أرفع عليه قضية خلع لأن دي مش عيشة وإنه بهدلها كتير معاه، قلتلها اللي تشوفيه مريحك اعمليه انا لو ليا بنت مرضلهاش الحال اللي انتي عايشة فيه ده وجيت معاها عشان أقعد بالعيال صعبان عليا الحال اللي وصلوا ليه بس هنعمل ايه».