أخبار محكمة الأسرة
8 سنين أشغال شاقة.. سارة تطلب الخلع والنفقة
تعلقت «سارة» بأمل الحصول على حريتها، بعد زواج دام لسنوات عاشت خلاله أسوأ أيام حياتها، فلجأت إلى محكمة الأسرة وأقامت دعوتي نفقة وخلع للحصول على حقوقها، مؤكدة أنها فرت من جحيم زوجها بعدما فشلت في إصلاحه.
قضايا محكمة الأسرة..كل حاجة في جوازي حصلت بسرعة
وقالت سارة: «متجوزة بقالي 8 سنين خلفت من جوزي ولد واحد بس، أنا وهو اتعرفنا على بعض لما كنا بنشتغل سوا كنت بحبه جدا ولما اتقدملي وافقت عليه على طول، واتجوزنا بعد خطوبة قصيرة وخلفت بعد الجواز على طول برضو».
دعاوي محكمة الأسرة..حياتي معاه كانت غلطة
أكملت «سارة» حديثها وقالت: «حصل بيني وبين جوزي خناقات كتير أوي وكنت فاكرة ان ده الطبيعي وكل المتجوزين كدة بس بعد كدة عرفت ان حياتي معاه كلها غلطة، كان بيغلط فيا ويشتمني ومش بيحترمني ولا بيحترم أهلي ومحدش قادر عليه، مكنش فيه جنيع بيصرفوا عليا غير بالذل والإهانة».
حكايات محكمة الأسرة..طردني عشان مزاجه مش رايق
تابعت «سارة» حديثها قائلة: «فضلت معاه على الحال ده ومكنتش برضى اسيبه لأني لسه بحبه ومش عايزة اسيبه واخرب بيتي وابهدل ابني، لحد أخر مشكلة حصلت بينا، لما طردني أنا وابني من البيت بحجة ان مزاجه مش رايق، وغضبانة وقاعدة عند أهلي وسايبة البيت 5 شهور ومحاولش يرجعني من ساعتها ولا بيسأل في ابنه».
قضايا محكمة الأسرة.. مش راضي يديني أي حاجة من حقوقي
أنهت «سارة» حديثها والدموع في الحزن في عينيها قائلة: «كل لما اكلم جوزي عشان يجبلي الهدوم بتاعتي من البيت ميرضاش وبيقولي انتي لو جيتي تاخدي حاجه هقول ان كان في فلوس وانتي سرقتيها، ومش راضي يصرف جنيه على ابنه وأنا بقيت مش عارفة اعمل ايه وخايفة ممكن يعمل معايا ايه، جيت المحكمة عشان ارفع عليه قضية خلع ونفقة عشان اعرف أخد حقي».