لقاء الخميسي: رفضت فيلم احكي يا شهر زاد بسبب مشهد في السرير

تحدثت الفنانة لقاء الخميسي عن علاقتها بزوجها محمد عبد المنصف حارس مرمى نادي الزمالك السابق ومنتخب مصر، كما كشفت عن رفضها فيلم احكي يا شهرزاد، وفيلم سكوت هنصور، بسبب المشاهد الجريئة.

وقالت لقاء الخميسي، خلال استضافتها ببرنامج "أسرار" مع الإعلامية أميرة بدر المذاع على قناة النهار: ممكن أكون أثرت على زوجي محمد منصف في حاجة، ولكن مش المسيرة، ولكن وقت ما اتجوزني الجماهير هاجمته أنا ليه ممثلة؟ زمان كانت وقتها فضيحة إنه يتجوز ممثلة، وأنا زوجي مأثرش فيا زي ما أنا أثرت فيه، ولادي اللي أثروا فيا جامد.

رفض فيلم احكي يا شهرزاد

أما عن تفاصيل رفضها فيلم احكي يا شهرزاد، فقالت لقاء الخميسي: اللي جوزي رفضه أنا كمان كنت هرفضه، وأنا مش واخدة على المشاهد المنفتحة الزيادة، وفيلم احكي يا شهرزاد اتعرض عليا دور المحامية اللي كانت قصاد أستاذ محمود حميدة، وكان فيه مشهد على السرير واللي رشحني أستاذ وحيد حامد الله يرحمه، وقابلته وقلت له مش هقدر أعمله علشان مشهد على السرير، قال لي انتي بتهزري؟! انتي بترفضي فيلم لـ وحيد حامد وأنا شايفك نجمة؟ قلت له لأ أنا مش برفض فيلم لو حضرتك شلت المشهد ده هامثل، قال لي مش انتي اللي هتقولي لي أشيل إيه ومشيليش إيه.

وتابعت: لو كنت قبلت ده كان هيحصل لجوزي مشاكل، خاصة إن جمهور الزمالك كان بيشتمه لأنه اتجوز ممثلة، فيه أعمال مهمة جدًا رفضتها وقعدت أعيط أسبوع في البيت بسبب مشاهد، ورفضت فيلم سكوت هنصور مع يوسف شاهين وكنت هاموت، رفضت الفيلم بسبب مشهد بوسة، وروبي هي اللي عملت الدور.

وأضافت: لو رجع بيا الزمن لو ما فيش بوسة في الفيلم هاقبله، وأنا ما باقولش إن اللي هيعمل ده مش كويس، ولكن أنا مش هاقدر، والفيلم التاني احكي يا شهرزاد مشهد كان بالنسبة ليا تقيل أوي ووقتها كنت متجوزة، ولو المشهد ده كنت عملته محمد عبد المنصف كان هيقعد في البيت.