أخبار محكمة الأسرة اليوم
محكمة الأسرة.. همسة في دعوى نفقة: مبيصرفش على ولاده ولا بيسأل فينا
لجأت همسة إلى محكمة الأسرة بعد معاناتها لسنوات مع زوجها الذي كان يغيب عنها وعن أولادها لفترات طويلة، تاركا لها مسؤولية البيت والأسرة، وكانت حجته أنه يذهب للعمل، حتى اختفى من حياة همسة ولم ينبهها أو يعلمها أين ذهب ومتى سيعود لتضطر الزوجة أن تتوجه لمحكمة الأسرة لتحصل على حريتها.
قصص محكمة الأسرة..الحياة كانت طبيعية ومفيش مشاكل
بدأت «همسة» حديثها: «أنا بقالي 16 سنة متجوزة، معايا من جوزي بنتين وولد، أنا وهو كنا قرايب من بعيد ولما اتقدم لي واتجوزنا مكنش فيه بينا مشاكل والدنيا كانت عادية حتى المشاكل كانت بسيطة، المشاكل بدأت وزادت أكتر من أول الجواز».
حكايات محكمة الأسرة.. جوزي بيختفي كل فترة ومعرفش بيروح فين
تابعت «همسة» حديثها قائلة: «من ساعة ما اتجوزته من زمان وهو بيختفي ومعرفش مكانه فين ولما بيرجع البيت كان بيقول إنه كان في الشغل، وكل ما بيرجع بيضربني ويهني بسبب ومن غير سبب، مكنتش أعرف هو بيختفي يروح فين أنا مش همشي وراه، بس كان بيختفي كتير أوي ويرمي مسؤوليى البيت والولاد عليا ومبيسألش فينا غير لما يرجع».
دعاوي محكمة الأسرة.. مش عارفة مكان جوزي فين
أضافت الزوجة: «أخر مرة خرج من البيت واختفى قعد فترة طويلة ومعرفتش هو فين وحاولت أوصله كتير لكن فشلت، ملقيتهوش في حته وهو معرفنيش هو فين، ودلوقتي سايبة البيت بقالي 5 سنين وهو بقاله 6 سنين مسالش فيا أنا والعيال أو طلب مننا إننا نرجع ».
قضايا محكمة الأسرة.. مبيصرفش على ولاده ولا بيسأل فينا
أنهت «همسة» حديثها قائلة: «صبرت عليه عشان يرجع لكن مفيش فايدة، ومن سنة بس رفعت عليه قضية نفقة عشان مبيصرفش على عياله ومعرفش مكانه فين، هو زمان كان بيصرف عادي بس أخر فترة بس بطل يصرف خالص أو يسأل حتى، أنا كنت رفعت عليه قضية طلاق للضرر لأني عايزة أطلق عشان أخد معاش أبويا هو معرفش حتى إني رفعت عليه قضية لأنه مبيسألش عشان يحاول يرجعني، واتجوز بعد ما سيبنا بعض قبل الطلاق ما يحصل حتى».