نادية لـ محكمة الأسرة: استغل ثقتي فيه ورماني في الشارع

كان سبب تواجد نادية على أبواب محكمة الأسرة هو أنها وثقت في زوجها الذي اختارته ان يكون شريك حياتها ووالد أطفالها لكنه استغل ثقتها فيه وبعد أول خلاف كبير بين الزوجين وسرقها وسرق تعبها وتركها في النهاية تتوجه لمحكمة الأسرة تبحث عن حقوقها الضائعة التي خسرتها بسببه وكانت تحمل الالم والحسرة عما عاشته في حياتها.

نادية لـ محكمة الأسرة: استغل ثقتي فيه ورماني في الشارع 
قصص محكمة الأسرة..الحياة كانت ماشية بستر ربنا 

قالت «نادية» في بداية حديثها : «أنا اتجوزت من ١٦ سنة كان جواز طبيعي كنا زي أي اتنين والحياة طبيعية، خلفت منه ٣ ولاد، هو كان بيصرف على البيت وعلى الدنيا كانت كويسة وماشية بستر ربنا». 

حكايات محكمة الأسرة..حصل بيني وبين جوزي مشكلة كبيرة

تابعت «نادية» حديثها قائلة: «المشاكل مع جوزي كانت زي اي اتنين متجوزين والمشاكل بتتحل بينا ومحدش بيتدخل، لحد ما حصل بينا مشكل في مرة وكانت كبيرة جدا بسبب إنه كان مش راضي يتحمل المسؤولية، ووقتها جوزي ساب البيت وكنا هنسيب بعض ونطلق ومنرجعش تاني».

دعاوي محكمة الأسرة..جوزي طردني أنا والعيال من الشقة

أضافت الزوجة: «الشقة اللي احنا كنا عايشين فيها كانت بتاعتي وأهلي اللي جايبنها، وأنا كنت عاملة لجوزي توكيل من فترة، وبعد فترة ما سيبنا بعض حاول أهلي وأهله يرجعونا لبعض لكن هو رفض ومرضيش يرجع، وبعدها جوزي كلمني وقالي انه باع الشقة لنفسه وأنا مكنتش مخوناه وكنت واثقة فيه انه مش هيبيع البيت اللي عايشة فيه أنا وولادي، لكن باع الشقة لنفسه واخرتها طردني من الشقة أنا والولاد».

قضايا محكمة الأسرة..راميني انا والعيال ومبيسالش فيا

أنهت «نادية» حديثها قائلة: «يعد ما طردني رجت عند أهلي ومن ساعة ما خرجت من البيت مرجعتش تاني، حاولت معاه كتير اننا نرجع لكن سابنا ومسالش فينا ولا بيصرف علينا حتى وانا عند أهلي، جيت المحكمة عشان ارفع عليه قضية تمكين وهرفع عليه قضية نفقة عشان حقي أنا وولادي هو سرقني ومعملش حساب للعشره وانا مش مسامحاه »