أخبار محكمة الأسرة
محكمة الأسرة .. غادة: طردني أنا والعيال عشان ميصرفش علينا
كانت محكمة الأسرة هي المكان الذي تواجدت فيه «غادة» بعد غدر زوجها بها وتركه لها ولأبنائها دون سند أو ضهر أو حماية في الدنيا، كل هذا لأنه رفض تحمل المسؤولية ورفض أن يصرف عليهم ويعطيهم احتياجاتهم، بعد تحمل الزوجة لزوجها طوال سنين زواجهم على أمل ان ينصلح حاله وتعيش معه حياة مستقرة ما وجدته منه هو القسوة والغدر حتى اضطرت أن تشتكيه في محكمة الأسرة.
قصص محكمة الأسرة.. أنا وجوزي كنا متربيين سوا
قالت «غادة» في بداية حديثها : «أنا اتعرفت على جوزي من زمان كان عيلتي تعرف عيلته ويعتبر متربيين مع بعض، لما كبرنا اتقدملي واتجوزنا وكنت فرحانة حدا إني هتجوز ويبقالي بيت وأسرة وأطفال وهو كان كويس جدا ومحترم ويعرف ربنا وخلفت منه ولد وبنت».
حكايات محكمة الأسرة.. مش عايز يشيل مسؤولية بيت وأسرة
تابعت «غادة» حديثها قائلة: «الخلافات مع جوزي بدأت من ساعة الخلفة لما المصاريف زادت هو بقى مش عايز يشيل مسؤوليتهم ولا يشيل أي مسؤولية ويصرف علينا اللي احنا محتاجينه عشان نعرف نعيش، وأنا كنت بعدي الحركات السخيفة اللي بيعملها عشان ميحصلش بينا مشاكل والبيت يتخرب وكنت بقضي الدنيا باللي يديهوني».
دعاوي محكمة الأسرة.. ضربني وطردني أنا والعيال عشان ميصرفش
أضافت الزوجة: «المشاكل كل مادى مع جوزي كانت بتزيد وهو بقى عصبي زيادة عن اللزوم لحد ما وصل بيه إنه بقى يضربني، لحد اخر مشكلة حصلت كان سببها المصاريف برضو ضربني وطردنا انا والولاد وحاليا انا وهما عايشين في ايجار من ٦ شهور ومدفعش لنا اي فلوس لا ايجار ولا ينفق على الولاد ».
قضايا محكمة الأسرة.. رافض يطلقني عشان يبهدلني
أنهت «غادة» حديثها قائلة: «طلبت الطلاق لاني كرهت الحياة المهينه اللي عشتها معاه وصبرت عليه كتير إنه يتعدل لكن مفيش فايدة معاه، رفض يطلقني ودي عشان يعملي مشكلة ويبهدلني وأنا مش عايزة منه حاجة أنا عايزاه بس يسيبنا في حالنا عشان كدة جيت أرفع عليه قضية خلع ونفقة عشان حقي أنا والعيال اللي هو واكله علينا».